کاروباری برادری نا ویل آتا ایسری کن تعلقدار ادارہ غاک اسیجائی سُج پام اس پک کیر،وزیراعظم محمد شہباز شریف

0

Get real time updates directly on you device, subscribe now.

اسلام آباد، وزیراعظم محمد شہباز شریف ملک انا بندرگاہ تا واکداری کچ اٹی ودکی، پاکستان نیشنل شپنگ کارپوریشن (پی این ایس سی) نا السرٹہیفنگ و جامع اصلاحات نا کمک اٹ ملکی سودریابی واپاری ءِ جہانی آب اتون ہم گرنچ کننگ نا پارت کرسا پارینے کہ پاکستان ءِ ڈیہہ انا اہم ءُ واپاری و ٹرانس شپمنٹ ہند اس جوڑ کننگ کن بندرگاہ تا نظام ءِ پوسکنوڑ کننگ المی ءِ‘ وزیراعظم محمد شہباز شریف نا کماشی ٹی ملک انا بندرگاہ و پاکستان نیشنل شپنگ کارپوریشن نا باندات آتتون تعلقدار اہم ءُ دیوان اس وزیراعظم ہاؤس اسلام آباد اٹی اڈ ہلک، ہراٹی ملک انا بندرگاہ تا کارکڑد اٹ جوانی اتنگ، سودریابی واپاری نا شون تننگ‘ پی این ایس سی نا اصلاحاتی ڈٹ و بحری بیڑہ غاتیٹی ودکی تون اوار چندی باندات آتا جاچ ءِ ہلنگا۔ دیوان نا شریدار آتیان تران کرسا وزیراعظم پارے کہ ملک اٹی کاروبار ءِ ودفنگ و زرگزرانی شونداری کن ننا بندرگاہ تا بھاز اہم ءُ کڑد اسے۔ وزیراعظم پارے کہ پاکستان ءِ ڈیہہ اٹی اہم ءُ واپاری و ٹرانس شپمنٹ ہند اس جوڑ کننگ کن بندرگاہ تا واکداری کچ اٹی ودکی المی ءِ۔ وزیراعظم پارت کرے کہ بندرگاہ تتون تعلقدار کل ادارہ غاک تین پہ تینی کمکاری اٹ کاریم کیر و واپاری برادری ءِ مون تروک آ ویل آتا ایسری کن گچین حکمت عملی اسے تینائی کیر۔ وزیراعظم مستی ہدایت کرے کہ بندرگاہ تیا گڑاتا سرکننگ‘ کلیئرنس و ایلو تعلقدار باندات آتے پوسکنوڑ تتون ہمگرنچ کننگے تاکہ واپاری برادری ءِ آسراتی فراوان مرے و واپاری سرجز آتیٹی ترندی برے۔ وزیراعظم پارے کہ پاکستان نیشنل شپنگ کارپوریشن ءِ پوسکنوڑ‘ سوگو و جہانی آب انا رِد اٹ گوبر ادارہ اس جوڑ کننگ کن جامع اصلاحات وخت نا اہم ءُ گرج اسے۔ وزیراعظم پارت کرے کہ پی این ایس سی نا بحری بیڑہ ٹی ودکی کن قابلِ عمل ڈٹ بندی کننگے تاکہ ملکی درآمد و برآمد آتیکن تینا شپنگ آسراتی تے شون تننگ مرے۔ دیوان ءِ پاکستان نیشنل شپنگ کارپوریشن اٹی اصلاحات نا بابت بریفنگ تننگا۔ دیوان ءِ پاننگا کہ پی این ایس سی نا بابت بزنس ڈویلپمنٹ پلان تیار کننگانے، پی این ایس سی نا اصلاحاتی پلان بزنس پلان نا رد اٹ فلیٹ نا کچ اٹی ودکی و ہیومن ریسورس مینجمنٹ نا بابت گام گیج آک اوار ءُ۔ دیوان ءِ پاننگا کہ پی این ایس سی نا اصلاحات نا بنداوی مسخت ملک انا سی کارگو نا واکداری کچ ءِ سال 2030ء اسکان دنیا نا گچین انگا آب اسکان رسیفنگ ءِ۔ دیوان اٹی بنجائی وزیر موسمیاتی بدلی مصدق ملک، بنجائی وزیر اقتصادی باندات احد خان چیمہ، بنجائی وزیر کانود و انصاف اعظم نذیر تارڑ، بنجائی وزیر بحری باندات جنید انور چوہدری، وزیراعظم نا سلاہکار پرائیویٹائزیشن محمد علی، وزیر مملکت خزانہ و ریلوے بلال اظہر کیانی، وزیراعظم نا خصوصی کمکار توانائی لیفٹیننٹ جنرل (ر) ظفر اقبال، قومی اسمبلی نا باسک محمد فاروق ستار و عبدالقادر پٹیل و تعلقدار بڑزکو سرکاری افسرآک بشخ ہلکر۔

Get real time updates directly on you device, subscribe now.

Leave A Reply

Your email address will not be published.