پاکستان واپاری وارخواہی تیان فائدہ ہرفنگ نا پبی لائخی تخک، جام کمال

جہانی کہول آ مال برداری نا خڑچ آتیٹی ودکی نا سوب آن علاقائی اقتصادی انضمام نا اہمیت ودانے

0

Get real time updates directly on you device, subscribe now.

اسلام آباد، بنجائی وزیر واپار جام کمال خان تون ترکمانستان ناوزیر واپار و خارجہ اقتصادی تعلقداری دورگلی سلیمانوف اسلام آباد اٹی اوڑدہی کرے وہڑتوم آ ملک آتا نیام اٹ واپار نا مونی دننگ، علاقائی رابطہ غاتا سوگوی، منڈی اسکان رسینگ اٹی گچینی وکاروباری کمکاری ءِ ودفنگ نا گام گیج آتیا گپ وتران کریر۔ بنجائی وزیر واپارجام کمال خان ترکمانستان نا وزیر نا ستاءِ کرسا پارے کہ ہڑتوم آ ملک آتا سوگو تعلقداری تے عملی واپاری شریداری ٹی بدل کننگ نا گرج ءِ، خاص وڑ اٹ ٹیکسٹائل، کشت وکشار، فوڈ پروسیسنگ، صنعتی پیداوار و رسینگ گیگ نا بشخ آتیٹی کمکاری نا گیشتر وارخواہی ساڑی ءِ۔ اوہڑتوم آملک آتا نیام اٹ کاروباری ڈل آتا ہن و برناستاءِ کرسا پوسکن آ زرکاری نا وارخواہی تا پیدواری و عمل نا قابل واپاری بست وبند آتا تیاری کن پدریسہ رابطہ غاتے برجا تخنگ نا گرج آ زور شاغا۔ جہانی اقتصادی حالیت آتیٹی بدلی تا ذکر ءِ کرسا بنجائی وزیر پارے کہ جہانی کہول آ مال برداری نا خڑچ آتیٹی ودکی و روایتی واپاری کسر تیٹی اڑاند آتا سوب آن علاقائی اقتصادی اواری نا اہمیت ودانے۔ اوپارے کہ پاکستان و ترکمانستان سویلی ایشیا، نیامی ایشیا و نیامی دے ٹک ءِ ملفوک آ مون آ بروک واپاری وارخواہی تیان فائدہ ہرفنگ نا پبی لائخی تخک۔ جام کمال خان اسلام آباد و اشک آباد نا نیام اٹ دراست فضائی جہاز آتا بناءِ کننگ و زوت خراب مروک آ کشاری و غذائی گڑاتا رسینگ گیگ کن چارٹرڈ کارگو سروس چلیفنگ نا سلاہ پیش کرے۔ اوپارے کہ ہڑتوم آ دارالحکومت آتا نیام اٹ کم فضائی فاصلہ دُن انگا برآمد آتے کن اہم فائدہ فراوان کننگ کیک ہرافتا وخت آ رسینگ گیگ المی مریک۔ ترکمانستان نا وزیر گچین فضائی رابطہ غاتا اہمیت ءِ امنا کرسا پارے کہ داسلاہ غا بروک آ اسیجائی بین الحکومتی کمیشن نا دیوان اٹی تعلقدار ہیوی ایشن نا کمامدارآتتون پین سجفنگ مریک۔ بنجائی وزیر کاروباری ویزہ غاتا دوئی کننگ اٹ آسراتی نا اہمیت آ ہم زور شاغسا پارے کہ پوریاگر و زرکارآتا آسان ہن و بر آن علاقائی اقتصادی کمکاری ءِ مونی دننگ مریک‘ داوخت آ ترکمانستان نا وزیر دورگلی سلیمانوف ہڑتوم آ کنڈآتا واپار اٹی ساڑی کمتی نا کچ ءِ توننگ نا گرج آ زور شاغا۔ اوپارے کہ ہڑتوم آملک آتا نیام اٹ واپاری کچ 2025ء ٹی 3 کروڑ60 لکھ امریکی ڈالر آن گدرینگاسس ولے دا 2024 ء نا مون اٹ کم و ود 23 درسد کم ئس۔ اوپارے کہ 2026ء نا اولیکو نہہ تُو اٹی ہڑتوم آ کنڈآتا واپار نا کچ کم و ود یک و نیم کروڑ ڈالر ئس ہرا تدوک آ سال انا ہندا وخت انا مون اٹ 56 درسد کم ءِ۔

Get real time updates directly on you device, subscribe now.

Leave A Reply

Your email address will not be published.