گوادر اٹ بجلی نا گرج آتا پوروی کن ایران و ترکمانستان کمک کننگ کیرہ،سردار اویس احمدخان لغاری
گوادر اٹی آخبت نا صنعتی و واپاری سرجز آتا سوب آن بجلی نا خواست اٹی بے کچ ودکی نا گمان ءِ
اسلام آباد، پاکستان و ترکمانستان علاقائی توانائی کمکاری، بجلی نا رسینگ گیگ انا نظام ءِ ودفنگ و اہم ٹرانسمیشن ڈٹ آتا پوروی کن تین پہ تینی کمکاری ءِ پین سوگو کننگ آ امنا کرینو۔ بنجائی وزیر توانائی سردار اویس احمد خان لغاری ترکمانستان نا وزیر توانائی اناگیلدی ساپاروف تون اوڑدہی ٹی ترکمانستان، اوغانستان و پاکستان (ٹاپ) پاور ٹرانسمیشن ڈٹ ءِ عملی دروشم تننگ، کاسا 1000 ڈٹ اٹی علاقائی اواری ءِ ودفنگ و گوادر نا آخبت نا توانائی گرج آتے پورو کننگ کن چندی سلاہ تے پیش کرے۔ اوڑدہی نا وخت آ ہڑتوم آ راہشونک توانائی کمکاری، علاقائی گرڈ کنیکٹیویٹی و ٹاپ ڈٹ نا پیشرفت آ جم گپ وتران کریر۔ بنجائی وزیر توانائی اویس لغاری ترکمان وزیر توانائی ءِ کاسا 1000 ڈٹ نا بشخ جوڑ مننگ نا سلہ خلسا پارے کہ تاجکستان و کرغزستان ءِ ہم کاسا 1000 ٹرانسمیشن لائن ءِ ازبکستان و ترکمانستان اسکان ودفنگ نا پاننگانے۔ او پارے کہ گوادر اٹی آخبت نا صنعتی و واپاری سرجز آتا سوب آن بجلی نا خواست اٹی بے کچ ودکی نا گمان ءِ، ہرانا رد اٹ ایران و ترکمانستان کمکاری اٹ ایرانی گرڈ نا کمک اٹ گوادر ءِ بجلی نا فراوانی ءِ ودفنگ نا گمان تا جاچ ءِ ہلیر۔ اویس لغاری سلاہ تس کہ دا مسخت کن ہڑتوم آ ملک آتا توانائی چاہندار آتیا تالان اسیجائی گروپ اس ٹہیفنگ مننگ کیک ہرا ایران نا کسر اٹ بجلی نا سرکننگ ءِ ودفنگ نا ٹیکنیکی و زرگزرانی گمان تا جاچ ءِ ہلے۔ بنجائی وزیر پارے کہ پاکستان علاقائی توانائی منڈی تا اواری و الس ءِ اڑزان بجلی فراوان کننگ کن سنبرینگوک ءِ۔ ٹاپ و کاسا 1000 ڈٹ آتا سرسہبی کن زرگزرانی و مالیاتی پالو تے مون آ تخنگ بھاز المی ءِ۔ او معلومدار کرے کہ پاکستان دا وخت آ بجلی نا پیداوار اٹی سرپلس تخک و ملک اٹی گوبر توانائی منڈی درستی راستی کرفنگ کن گام گیج کننگ اٹی ءِ۔