ای سی او ملک آک تینا جغرافیائی خڑکی تے کمکاری ٹی بدل کیر ،سینیٹر محمد اسحاق ڈار
ساڑی جغرافیائی سیاسی غیر یقینی حالیت، زرگزرانی دباؤ و تیز رفتار تکنیکی بدلی تا رداٹ کمکاری المی ءِ
اسلام آباد، نائب وزیراعظم و وزیرخارجہ سینیٹر محمد اسحاق ڈار اقتصادی کمکار تنظیم (ای سی او) نا باسک ملک آتیا زور شاغانے کہ او تینا جغرافیائی خڑکی ءِ گچین علاقائی رابطہ و اقتصادی کمکاری ٹی بدل کیر تانکہ ڈیہہ انا الس نا مدامگی شونہالی ءِ پک کننگ مرے۔ داخیال آتا درشانی ءِ او دوشنبے نادے آ اسلام آباد اٹی اقتصادی کمکار تنظیم (ای سی او) نا وزارتی کونسل نا 30 می دیوان آن تران کرساکرے۔ اوپارے کہ پاکستان علاقائی کمکار ی ءِ شونہالی، امن و سوگوی نا مونی دننگ نا اہم وڑ تکک، دارداٹ وتواجہ بریبری، تین پہ تینی شرف، بے نیام تمنگ و تین پہ تینی فائدہ غاتیا تالان کمکاری نا اصول آتے بنداوی اہمیت دوئی ءِ۔ نائب وزیراعظم پارے کہ ساڑی آ جغرافیائی سیاسی غیر یقینی حالیت، زرگزرانی دباؤ و تیز رفتار تکنیکی بدلی تا رداٹ علاقائی کمکاری نا اہمیت مہالو آن بھاز زیات ودانے۔ سینیٹر محمد اسحاق ڈار ڈیہہ انا یکتا جغرافیائی اہمیت و چندی بشخ آتیٹی ساڑی گیشتر گمان تے تالان کرسا پارے کہ کاروباری سرجزآتے آسان جوڑ کننگ کن گچین ٹرانسپورٹ راہداری، سیمی وڑوڈول ءِ آسان جوڑ کننگ و قابل پیش گوئی بست وبند آتا گرج ءِ۔ اواقتصادی کمکار تنظیم نا پاکستان نا کماشی ٹی اولیت آتا ذکر ءِ کرسا پارے کہ پاکستان گیشتر منڈی اسکان رسینگ، سوگو علاقائی ویلیو چینز و پرائیویٹ بشخ خاص وڑ اٹ چنکا و نیامی درجہ نا کاروباری ادارہ (ایس ایم ایز) نا زیات آن زیات اواری نا مخ تفی ءِ کیک تانکہ واپار و زرکاری ءِ مونی دننگ مرے۔ نائب وزیراعظم پارے کہ پاکستان نیامی ایشیاء، سویلی ایشیا و بحیرہ عرب نا کرک آ ساڑی پاکستانی بندرگاہ تا نیام اٹ ٹرانسپورٹ و ٹرانزٹ رابطہ غاتے سوگو کننگ کن باسک ملک آتتون اواری اٹ کاریم کیک۔