پاکستان اقتصادی کمکار تنظیم نا باسک ملک آتا نیام اٹ کمکاری کن سنبرینگوک ءِ،وزیراعظم محمد شہباز شریف
ڈیہہ انا الس ءِ کمکاری نا حقی بھرم ءِ رسیفنگ کن تنظیم نا اسیجائی ہدف آتے عملی گام گیج اٹی بدل کننگ المی ءِ، تنظیم نا اسیجائی وژن ءِ پیدوار بھرم تا دوئی کننگ کن پبی گام گیج آتیٹی بیرفنگ المی ءِ
اسلام آباد، وزیراعظم محمد شہباز شریف پارینے کہ پاکستان اقتصادی کمکار تنظیم (ای سی او) نا باسک ملک آتا نیام اٹ علاقائی کمکاری، واپاری رابطہ و زرگزرانی اواری نا شون تننگ کن سنبرینگوک ءِ، وخت اس کہ تنظیم نا اسیجائی ہدف آتے عملی گام گیج آتیٹی بدل کننگ المی ءِ تاکہ ڈیہہ انا الس ءِ دا کمکاری نا حقی بھرم آک دوئی مریر۔ وزیراعظم تون تدوک آدے ای سی او نا باسک ملک آتا وزیرخارجہ و ڈَل آتا سروک آک اوڑدہی کریر۔ ڈَل آک ای سی او وزراء کونسل نا 30 می دیوان اٹی بشخ ہلنگ کن اسلام آباد اٹی ساڑی ءُ۔ وزیراعظم شہباز شریف شرفمند آ مہمان تے بخیر کرسا دیوان اٹی بشخ ہلنگ آ اوفتا منت واری ءِ ہرفے و ای سی او نا مسخت آتا دوئی کننگ کن پاکستان نا سوگو ارادگی نا دوارگی ءِ کرے۔ او 30 می دیوان نا سرسہب اڈ ہلوک عمل نا سفت ءِ کرسا اسلام آباد اعلامیہ و 2026ء آن 2035ء اسکان زرگزرانی کمکاری کن پک کروک اسٹریٹجک ہدف آتا منظوری ناستاءِ کرے۔ وزیراعظم دا پیشرفت آتے تنظیم نا سوگوی و ڈیہہ انا اسیجائی اولیت آتا دوئی کننگ نا کنڈ آ اہم ءُ گام اس گوندا۔ او پارے کہ 2026ء آن 2027ء اسکان ای سی او نا کماشی پاکستان ءِ ملنگ اہم ءُ وارخواہی اسےِ، ہراڑکن ‘سوگو و مستحکم ای سی او کن علاقائی کمکاری نا بحالی’ نا سرحال پک کننگانے۔ او زور شاغا کہ تنظیم نا اسیجائی وژن ءِ ہندن انگا ارادگی و پیدوار گام گیج آتیٹی بدل کننگ نا گرج ءِ ہرافتیاں بروک آ بھرم آک پیدوار مریرہ و باسک ملک آتا الس ءِ دراست فائدہ رسینگک۔ دا رد اٹ واپاری‘ زرکاری، ٹرانسپورٹ، راہداری‘ توانائی، حوالکاری و مواصلاتی ٹیکنالوجی و مدامگی شونداری نا بشخ آتیٹی کمکاری ءِ ودفنگ آ ہم زور شاغا۔ وزیراعظم پارے کہ علاقائی زرگزرانی کمکاری ءِ تیز کننگ کن ای سی او نا ساڑی معاہدہ غاتیا بھرمی عملدرآمد و تنظیم نا ادارہ ئی نظام ءِ پین سوگو کننگ المی ءِ۔ پاکستان نا جغرافیائی جاگہ نا حوالہ ءِ ترسا وزیراعظم پارے کہ پاکستان کسر، ریلوے و ایلو نقل و حمل آ تالان راہداری تا کمک اٹ علاقائی رابطہ غاتے شون تننگ کن سنرینگوک ءِ۔ دا ڈٹ آتیٹی کراچی، پورٹ قاسم و گوادر نا بندرگاہ تیان رابطہ غاک ہم اوار ءُ، ہرافتیان خاص وڑ اٹ ہمو باسک ملک آتے علاقائی و جہانی منڈی تسکان رسینگ اٹی کمک رسینگک ہرافتتون تینا جند انا سوردریابی بندرگاہ اف۔ وزیراعظم شہباز شریف جھیڑہ غاتا پرامن ایسری کن مذاکرات و سفارت کاری آ پاکستان نا اصولی موقف نا دوارگی ءِ کرے و پارے کہ علاقائی سلامتی ءِ مون تروک خطرہ غاتتون مون تننگ کن اسیجائی کوشست آک المی ءُ۔ او ای سی او نا باسک ملک آتے سلہ خلک کہ او 2027ء کن لاہور ءِ تنظیم نا سیلانی ہند گوندنگ نا رد اٹ اڈ ہلوک دود آتیٹی پبی بشخ ہلیک۔ وزیراعظم دا ارادگی نا درشانی ءِ ہم کرے کہ پاکستان تینا کماشی نا وخت آ ای سی او ءِ پین بھرمی و سوگو جوڑ کننگ کن کل باسک ملک و تنظیم نا سیکرٹریٹ تون اوار کاریم کیک۔ وزیراعظم پارے کہ پاکستان 2027ء اٹی ای سی او وزراء کونسل نا بروک آ دیوان و ای سی او سروکی دیوان نا وخت آ باسک ملک آتا ڈَل آتے بخیر کیک۔