سرکاری اسکول آتا غیر تدریسی وڑ تے کن کاریم اٹ اتنگ ءِ چٹفنگ اُن،وزیر اعلیٰ میر سرفراز بگٹی
صوبائی حکومت اولیکو دے آن پیدوار ایجنڈا نا رد اٹ السی خذمت، قول آتا پوروی، میرٹ نا شونداری ءِ پک کننگ آ کاریم کرینے
قطبی ڈیرہ بگٹی، وزیراعلیٰ بلوچستان میر سرفراز بگٹی قطبی ڈیرہ بگٹی اٹی ماڈل سیکنڈری اسکول میر غلام قادر بگٹی نا بنامروک آ ڈٹ انا دورہ ءِ کرے و علاقہ ٹی تعلیمی آسراتی تا جوانی کن برجا گام گیج آتا جاچ ءِ ہلک۔ دا وخت آ شاری و سرکاری افسر آتتون ہیت وگپ کرسا وزیراعلیٰ پارے کہ صوبائی حکومت نا اولیکو دے آن پیدوار ایجنڈا السی خذمت، قول آتا پوروی، میرٹ نا شون تننگ و شونداری ڈٹ آتیٹی آب ءِ پک کننگ ءِ۔ حکومت ہمو گام گیج آتیا چکار کننگ اٹی ءِ ہرافتیان بروک آ بھرم تے الس ءِ عملی وڑ اٹ خننگ کے و ہرافتیان اوفتا زند آتیٹی حقی جوانی برے۔ میر سرفراز بگٹی پارے کہ ساڑی حکومت نا دور اٹی سرکاری افسرو سول بیوروکریسی تینا زمواری تے ادا کرسا بلوچستان نا شونداری ٹی اہم ءُ کڑد اس ادا کرینو۔ او پارے کہ سرکاری مشینری نا بھرمی کارکڑد و ادارہ غاتا نیام اٹی ہم گرنچی اٹ السی خذمت و شونداری نا مسخت آتا دوئی کننگ ءِ پک کننگ انگ ءِ۔ وزیراعلیٰ بلوچستان اٹی امن و سوگوی کن کانود نافذ کروک ادارہ غاتا خذمت آتے خراجِ تحسین پیش کرسا پارے کہ تدوک آ 78 سال اٹ دا ادارہ غاتا قربانیک گیرام دننگ مفسہ‘ پاک فوج، فرنٹیئر کور‘ بلوچستان پولیس و ایلو کانود نافذ کروک آ ادارہ غاتا افسرو ورناک صوبہ ٹی امن‘ الس نا رکھ و ریاستی عملداری ءِ برجا تخنگ کن بے مٹ خذمت سر تسنو۔ او پارے کہ صوبائی حکومت سرکاری اسکول آتے غیر تدریسی مسخت آتیکن کاریم اٹ اتنگ نا روایت ءِ چٹفنگ کن بھرمی گام گیج کننگ اٹی ءِ۔ اسکول آتا ماڑیک چناتا تعلیم و ہیلکاری کن ءُ، اوفتے مہمان خانہ یا ایلو غیر تعلقدار مسخت آتیکن کاریم اٹ اتنگ نا جاگہ غا تدریسی سرجز آتیکن فعال تخنگے۔ تعلیمی ادارہ غاتا بحالی و اوفتے ٹی تدریسی عمل نا ریسہ ءِ پک کننگ حکومت نا اولیت آتیٹی اوار ءِ۔ میر سرفراز بگٹی پارے کہ صوبائی حکومت شعبہ تعلیم تون اوار جانجوڑی نابشخ اٹ کیہی اہم گام گیج کرینے ہرافتیاں لکھ آ شاریک فائدہ ہرفنگ اٹی ءُ۔ ہیلتھ کارڈ انا آسراتی آن ہلسا پوسکن آ ہسپتال جوڑ کننگ و درمان نا آسراتی تا جوانی اسکان گام گیج آتا کمک اٹ الس ءِ آب اٹو طبی آسراتی تا فراوانی ءِ پک کننگ انگ ءِ۔ وزیراعلیٰ پارے کہ تعلیم نا بشخ اٹ حکومتی گام گیج آتا مثبت بھرم آک مونی بننگ اٹی ءُ ہرافتا امنائی بنجائی حکومت و جہانی فورم آتیا ہم کننگانے۔