سگ، تین پہ تینی شرف و گپ وتران امن نا بنداو ءُ، سینیٹر اعظم نذیر تارڑ
اسلام آباد، بنجائی وزیر انسانی حق سینیٹر اعظم نذیر تارڑ پارینے کہ سگ، تین پہ تینی شرف و انسانیت نا شرف پرامن، یکجا و شون ہلوک راج اسے نا بنداوی اصول ءِ، راج اٹی اختلاف سلاہ درشانی‘ مذہبی و دودوربیدہ ئی وڑ پہ وڑی و کیہی نقطہ نظر ءِ سگنگ نا رویہ ءِ مونی دننگ وخت انا اہم گرج ءِ۔ دوشنبے نادے آ جہانی سگ دے انا وخت آ جاری کلہو اٹی سینیٹر اعظم نذیر تارڑ پارے کہ خار، بے سگی، تعصب و انتہاپسندی راجی اہم گرنچی و امن کن چیلنج ءُ، دا رویہ غاتا مقابلہ ءِ تعلیم، گپ وتران، کانود نا حکمرانی و زموارانہ وڑوڈول انا کمک اٹ کننگ مریک۔ اوپارے کہ مذہبی ہم گرنچی و راجی رواداری نا مونی دننگ اٹی ریاستی ادارہ، تعلیمی ادارہ، مذہبی سرکڑدہ‘ میڈیا سول سوسائٹی تون اوار راج انا کل تپہ غاتا اہم کڑد ءِ، اختلاف آتے جھیڑہ نا جاگہ غا گپ وتران و تین پہ تینی شرف نا کمک اٹ ایسر کننگ نا روایت ءِ سوگو کروئی مریک۔ بنجائی وزیر دا ارادگی نا درشانی ءِ کرے کہ حکومت پاکستان آئین نا رداٹ کل شاری تا بریبر حق، مذہبی آجوئی و انسانی وقار نا رکھ اکن سنبرینگوک ءِ۔