وزیراعلیٰ نا وژن صوبہ ءِ ملکی و جہانی زرکار آتا ہند جوڑ کننگ ءِ،شاہدرند، بلال کاکڑ

بلوچستان اٹی مثت و زموار صحافت نا اسہ سوگو ءُ روایت اس ساڑی ارے، صوبہ ٹی زرکاری نا شون تننگ کن میڈیا نا کمکاری بھاز اہم ءِ

0

Get real time updates directly on you device, subscribe now.

کوئٹہ، وزیراعلیٰ بلوچستان نا خصوصی کمکار حوالکاری و سیاسی باندات شاہد رند و بلوچستان انویسٹمنٹ بورڈ نا وائس چیئرمین بلال خان کاکڑ اسک پارینو کہ وزیراعلیٰ بلوچستان میر سرفراز بگٹی نا وژن صوبہ ءِ ملکی و جہانی زرکاری نا ہند جوڑ کننگ ءِ، ہراڑکن کل اسٹیک ہولڈر آتتون اوار کاریم کننگ انگ ءِ‘۔ بلوچستان نا ویل، وارخواہی و مثبت زانت ءِ پاش کننگ اٹی میڈیا نا کڑد بھاز اہمیت تخک۔ دا خیال آتا درشانی ءِ او بلوچستان انویسٹمنٹ اینڈ ٹریڈ ایکسپو (BITE 2026) نا رد اٹ کوئٹہ نا صحافی و سوشل میڈیا انفلوئنسر آتا شرف اٹ اڈ ہلوک آ نیٹ ورکنگ لنچ آن تران کرسا کریر‘ داوخت آ بی بی او آئی ٹی نا چیف ایگزیکٹو آفیسر عبدالمنان، بلوچستان یونین آف جرنلسٹس نا صدر منظور احمد، وزیراعلیٰ بلوچستان نا پریس سیکرٹری شیخ عبدالرزاق و سینئر صحافیک ساڑی ئسر۔ خصوصی کمکار حوالکاری شاہد رند پارے کہ بلوچستان اٹی مثبت و زموار صحافت نا اسہ سوگو ءُ روایت اس ساڑی ارے و صوبہ ٹی زرکاری نا شون تننگ کن میڈیا نا کمکاری بھاز اہم ءِ۔ او پارے کہ بلوچستان انویسٹمنٹ بورڈ ءِ بھرمی و فعال ادارہ اس جوڑ کننگ اٹی وائس چیئرمین بلال خان کاکڑ نا کوشست آک ستا کڑزرہ، ہرا کوئٹہ تون اوار کراچی، لاہور و اسلام آباد اٹی ہم زرکار آتے بلوچستان اٹی کاروبار نا وارخواہی تیان معلومدار کرے۔ شاہد رند پارے کہ BITE 2026 نا اسہ اہم ءُ خصوصیت اس Made in Balochistan آ چکار کننگ ءِ، ہرانا کمک اٹ ہندی صنعت کار، واپاری بندغ، چنکا کشارگر و ہنرمند آتے تینا پیداوار تے درستی راستی کرفنگ نا وارخواہی رسینگک‘ او باور کرفے کہ بلوچستان نا میڈیا زرکاری، واپاری و صوبہ نا زرگزرانی شونداری کن برجا کوشست آتیٹی تینا مثبت و زموار کڑد ءِ برجا تخک۔ بلال خان کاکڑ پارے کہ 18 و 19 نومبر آ اڈ ہلوک آ BITE 2026 نا بنداوی مسخت بلوچستان نا ہندی صنعت، واپاری بندغ‘ چنکا کشارگر و ہنرمند آتا پیداوار آتے درستی راستی کرفنگ و اوفتے قومی و جہانی الاقوامی منڈی تیاں رسینگ نا وارخواہی فراوان کننگ ءِ۔ ایکسپو ٹی ملک انا چندی شار تیان پنی آ صنعت کار و واپاری شخصیت آک ہم بشخ ہللکر‘ او پارے کہ ایکسپو ورنا تیٹی کاروبار و جندی روزگار نا رجحان ءِ شون تننگ نا کمکار مریرہ‘ انتئے کہ روزگار نا وارخواہی تا ودی کننگ کن ورنا تے ملازمت تون اوار تینا کاروبار بنا کننگ نا کنڈ آ دننگ المی ءِ۔

Get real time updates directly on you device, subscribe now.

Leave A Reply

Your email address will not be published.