ٹریفک کانود آتا رند ءِ دننگ ہر شاری نا بنداوی زمواری ءِ،آئی جی پولیس
شار اسے نا ٹریفک نظام ءِ ہُرسا او جاگہ نا شاری تا نظم و ضبط و کانود نا رند دننگ نا کساس کننگک
کوئٹہ، آئی جی پولیس بلوچستان محمد طاہر پارینے کہ ٹریفک کانود آتا پابندی ہر زموار شاری نا بنداوی زمواری ءِ و اوفتیا عملدرآمد آن بیرہ ڈیور آتا آخا بلکہ کسر ءِ کاریم اٹ اتوک آ ایلو بندغ آتا زند ہم گمانی شکست آتیان رکھوک مننگ کیک‘ دا ہیت ءِ او ٹریفک پولیس کوئٹہ نا ہرمسٹ آ زون (سٹی، سریاب و صدر) ءِ ٹریفک نا روانی ءِ گچین جوڑ کننگ کن پوسکن ءُ گاڈی تننگ نا رد اٹ اڈ ہلوک دود آن تران کرسا کرے۔ دود اٹی ایڈیشنل آئی جی و کمانڈنٹ بلوچستان کانسٹیبلری محمد اشفاق احمد، صوبائی سیکرٹری ٹرانسپورٹ محمد حیات کاکڑ، ڈی آئی جی ہیڈکوارٹرز طاہر علاؤالدین، ڈی آئی جی فنانس سہیل احمد شیخ، ڈی آئی جی کوئٹہ عمران شوکت، چیف میٹروپولیٹن کارپوریشن میجر (ر) بشیر بڑیچ، ایس ایس پی ٹریفک دوستین دشتی، ایس ایس پی آپریشنز کوئٹہ ضیاء الحق مندوخیل و ایلو بڑزکو کمامدار آک بشخ ہلکر۔ آئی جی پولیس محمد طاہر پارے کہ شار اسے نا ٹریفک نظام ءِ ہُرسا ہمو جاگہ نا شاری تا نظم و ضبط و کانود آ عملدرآمد نا کساس مننگ میک۔ او پارے کہ ٹریفک کانود آتا خلاف ورزیک وخت و ایندھن نا زیان تون اوار ٹریفک شکست آتا سوب ہم مریرہ۔ او ٹریفک انجینئرنگ بیورو و ٹریفک پولیس آ زور شاغا کہ او تین پہ تینی کمکاری و اسیجائی حکمت عملی نا رد اٹ ٹریفک نظام نا جوانی کن بھرمی کڑد ادا کیر۔ او پارے کہ بلوچستان پولیس حکومت بلوچستان نا کمکاری و مالی کمک آن پوسکنوڑ پولیسنگ نا شون تننگ کن پوسکنوڑ ٹیکنالوجی آن فائدہ ہرفنگ اٹی ءِ۔ آئی جی پولیس پارے کہٹریفک پولیس ءِ فراوان کروک پوسکن آ گاڈیک پوسکنوڑ ازباب و کیمرہ تیاں تالان مریرہ و اوفتے سیف سٹی اتھارٹی تون اوار کننگک ہراڑان ٹریفک نا حالیت نا بھرمی چاروکی و روانی ءِ برجا تخنگ اٹی کمک رسینگک‘ او سخت موسمی حالیت آتیٹی زمواری سر تروک ٹریفک کارندہ غاتا خذمت آتاستاءِ کرسا الس آن ہم خواست کرے کہ او ٹریفک کانود آتیا عملدرآمد ءِ پک کننگ اٹی تینا کڑد ءِ ادا کیر۔