پاکستان ایران تون تعلقداری تے پین سوگو کننگ، علاقائی امن کن کوشست آتے برجا تخک،وزیراعظم شہباز شریف

انطالیہ، وزیراعظم محمد شہباز شریف ایران نا صدر ڈاکٹر مسعود پزشکیان تون اوڑدہی ٹی ڈیہہ انا بدل مروک آ حالیت و برجا جھیڑہ غاتیا گڑتی نا درشانی ءِ کرسا مدامگی امن و سوگوی نا دوئی کننگ کن مذاکرات، سگ، بے چیٹی تیٹی کمتی و پدریسہ سفارتی رابطہ غاتے المی گوندا۔ ہڑتوم آ سرکڑدہ غاک پاکستان و ایران نا متکن آ تعلقداری تے پین سوگو کننگ و ڈیہہ انا امن‘ سلامتی و شونہالی کن اسیجائی کوشست آتے برجا تخنگ نا ارادگی نا درشانی ءِ کریر۔ وزیراعظم شہباز شریف و ایرانی صدر ڈاکٹر مسعود پزشکیان نا نیام اٹی دا اوڑدہی انطالیہ، ترکیہ ٹی اقوامِ متحدہ نا موسمیاتی بدلی کانفرنس (کوپ 31) انا سروکی دیوان نا وخت آ مس۔ اوڑدہی ٹی بنجائی وزیر حوالکاری وشینکاری عطاء اللہ تارڑ، سینیٹر شیری رحمان و ہڑتوم آ ملک آتا بڑزکو کہولی کمامدار آک ہم ساڑی ئسر۔ جوان ءُ چاگڑد اسے ٹی مروک اوڑدہی ٹی ہڑتوم آ سرکڑدہ غاک پاکستان و ایران نا نیام اٹی خڑرک و متکن آ تعلقداری تا ریسہ پک ءِ کریر و تین پہ تینی کمکاری نا کل بشخ آتیٹی ہڑتوم آ پالو تا رابطہ غاتے پین سوگو کننگ نا گرج آ زور شاغار۔ دا وخت آ ڈیہہ انا بدل مروک حالیت آ جم گپ وتران کننگا۔ وزیراعظم شہباز شریف ڈیہہ اٹی بھلو وخت اسے آن برجا جھیڑہ غا گڑتی نا درشانی ءِ کرسا پارے کہ مدامگی امن و سوگوی نا دوئی کننگ کن مذاکرات، سگ، بے چیٹی تیٹی کمتی و پدریسہ سفارتی رابطہ غاتے برجا تخنگ المی ءِ۔ وزیراعظم جون 2026ء اٹی اسلام آباد مفاہمتی یادداشت نا رد اٹ پک مروک مفاہمت آتے مونی دننگ نا اہمیت آ ہم زور شاغا و ڈیہہ انا امن و سوگوی کن پاکستان نا کنڈ آن سخت و تعمیری کڑد ءِ برجا تخنگ نا ارادگی نا دوارگی ءِ کرے۔ ایرانی صدر ڈاکٹر مسعود پزشکیان ایران کن پاکستان نا پدریسہ سفارتی مخ تفی و ڈیہہ اٹی امن و سلامتی کن پاکستان نا کوشست آتاستاءِ کرسا پارے کہ کرن آتیا تالان اسیجائی تاریخ، ربیدہ و مذہب آ تالان ہڑتوم آ ملک آتا تعلقداری تا مدامگی سوگوی ءِ پیدوار کرے و جتا بشخ آتیٹی کمکاری ءِ پین ودفنگ کن تہران نا استخواہی تا درشانی ءِ کرے۔ اوڑدہی ٹی ہڑتوم آ راہشونک اسیجائی چیلنج آتتون مون تننگ و مونی بروک آ وارخواہی تیاں فائدہ ہرفنگ کن باقاعدہ سلابت و خڑک رابطہ کاری نا اہمیت آ امنا کریر۔ ہڑتوم آ فریق آک ڈیہہ انا امن، سلامتی و شونہالی کن اوار کاریم کننگ نا ارادگی نا ہم درشانی ءِ کریر۔