شاری اسے مالی ویل آتا سوب آن کانودی نمائندگی آن محروم تخنگپ،چیف جسٹس آف پاکستان

اسلام آباد، سپریم کورٹ آف پاکستان اٹی جسٹس جمال خان مندوخیل نا ریٹائرمنٹ نا وخت آ فل کورٹ ریفرنس آن تران کرسا چیف جسٹس آف پاکستان جسٹس یحییٰ آفریدی جسٹس جمال خان مندوخیل نا شانی آ عدالتی خذمت آتے خراجِ تحسین پیش کرے۔ چیف جسٹس پارے کہ جسٹس جمال خان مندوخیل نا عدالتی خذمت آک انصاف نا فراوانی تون نزور مفروک وابستگی نا ڈیک ءُ، چیف جسٹس، جسٹس جمال خان مندوخیل نا بلوچستان نا بار آن سپریم کورٹ اسکان نا کسبی سفر ناستاءِ کرے۔ چیف جسٹس آف پاکستان پارے کہ جسٹس جمال خان مندوخیل آئینی کانود، عدالتی انتظام و ادارہ ئی شونداری ٹی نمان خذمت سر تس، چیف جسٹس بلوچستان ہائی کورٹ نا وڑ اٹ جسٹس جمال خان مندوخیل ضلعی عدلیہ و عدالتی انفراسٹرکچر نا سوگوی ٹی اہم کڑد ادا کرے، جسٹس جمال خان مندوخیل نا سخت اٹ سلابت و کمکاری سپریم کورٹ اٹی تین پہ تینی ہم گرنچی ءِ شون تس۔ چیف جسٹس آف پاکستان جسٹس جمال خان مندوخیل نا خذمت آتیا منتواری نا درشانی ءِ کرے و اوڑکن نیک انگا است خواہی تا درشانی ءِ کرے۔ چیف جسٹس پارے کہ بینچ و بار نظامِ انصاف نا المی تمبہ ءُ، بینچ و بار انا نیام اٹی تین پہ تینی شرف، ہم گرنچی و گچین رابطہ غاتے برجا تخنگ المی ءِ، عدالتی انتظام اٹی شفافیت، یکسانیت و پرسجو ءِ پک کننگ کن جم آب وڑ و ڈول لاگو کننگانے، اسہ شاری اسے ہم مالی ویل آتا سوب آن کانودی نمائندگی آن محروم تخنگپ۔ چیف جسٹس آف پاکستان جتا جتا کہول آتیا مفت کانودی کمک نا فراوانی نا ارادگی نا دوارگی ءِ کرے۔