طالب علم آتے تینے ٹی حالیت آتتون ہم گرنچ کننگ نا بود ودی کروئی تمک،جعفرخان مندوخیل

کوئٹہ، جامعہ بلوچستان، کوئٹہ نا 22 می کانووکیشن نا شرفدار آ دود یونیورسٹی لاء کالج اٹی اڈ ہلک۔ دود انا خاص انگا گورنر بلوچستان شیخ جعفر خان مندوخیل ئس۔ کانووکیشن نا وخت آ 23 اسکالر آتے پی ایچ ڈی، 29 اسکالر آتے ایم فل نا ڈگری وخت اس کہ 58 نمان اولیکو پوزیشن دوئی کروک طالب علم آتے گولڈ میڈل تننگا۔ دود اٹ صوبائی وزیر تعلیم راحیلہ حمید خان درانی، وائس چانسلر جامعہ بلوچستان پروفیسر ڈاکٹر ظہور احمد بازی، صوبائی وزیرک، صوبائی اسمبلی ناباسک آک‘ جتا محکمہ غاتا سیکرٹریک، جتا جتا جامعہ غاتا وائس چانسلر، رجسٹرار، ڈینز، ڈائریکٹرز و طالب علم و لمہ باوہ غاتا بھلو کچ اس بشخ ہلک۔ گورنر بلوچستان شیخ جعفر خان مندوخیل تران کرسا پارے کہ جامعہ بلوچستان صوبہ نا پنی آ تعلیمی ادارہ غاتیان اسٹ ءِ ہرانا فارغ التحصیل طالب علم آک قومی تعمیر و شونداری ٹی اہم کڑد ادا کرینو۔ او پارے کہ یونیورسٹی نا ایلومنائی اٹی متحرک راہشون، دانشور و محقق آک اوار ءُ۔ او پارے کہ نن چارمیکو صنعتی انقلاب نا دور اٹی زند گدریفنگ اٹی اُن‘اے آئی، ڈیٹا سائنس، شمسی توانائی و پوسکنوڑ شونداری نا تصور آتے بدل کرینو۔ دا دور اٹی بیرہ روایتی ڈگریک بھاز افس، طالب علم آتے کسب‘ تخلیقی سوچ و تینے حالیت آتتون ہم گرنچ کننگ نا بود ودی کروئی تمک۔ وائس چانسلر پروفیسر ڈاکٹر ظہور احمد بازی سال 2025-26ء اٹ جامعہ نا تعلیمی و پٹ وپولی پیشرفت آ ہیت کرسا او پارے کہ یونیورسٹی پٹ وپول‘ پوسکن آ پروگرام و انفراسٹرکچر اٹی نمان سرسہبی دوئی کرینے۔ دود انا اخیر اٹ گورنر بلوچستان اسکالر آتیٹی ڈگری و گولڈ میڈل بشخ وپانٹ کرے وخت اس کہ شرفدار مہمان تے ٹی اعزازی شیلڈ ہم تننگا۔