ڈوہ تا چٹفنگ کن کل دوئی وسیلہ غاتے کاریم اٹ اتنگ انگ ءِ،آئی جی پولیس بلوچستان

کوئٹہ، انسپکٹر جنرل پولیس بلوچستان محمد طاہر چارشنبے نادے آ ضلع کیچ (تربت) نا اہم دورہ ءِ کرے۔ ہراڑے او مکران رینج اٹی امن و ایمنی و سیکورٹی نا جم حالیت آتا جاچ ءِ ہلک۔ داوخت آ ڈی آئی جی مکران رینج آئی جی پولیس ءِ امن و ایمنی نا حالیت سیکورٹی بست وبند و ڈوہ تا توننگ کن کروک آ گام گیج آتیا سرجمی اٹ حوال تس۔ آئی جی پولیس نا کماشی ٹی اڈ ہلوک دیوان اٹی سیکورٹی باندات‘ ڈوہ تا توننگ، منشیات نا برخلاف برجامہم و پولیس گشت انا نظام نا جاچ ءِ ہلنگا، وخت اس کہ پولیسنگ و السی رکھ انا گام گیج آتیا ہم گپ وتران کننگا۔ آئی جی پولیس محمد طاہر پولیس شہید آتا خاہوت آتتون خصوصی اوڑدہی کرے و شہید آتا عظیم قربانی تے گچین لوز آتے ٹی خراج عقیدت پیش کرے۔ اوپارے کہ پولیس شہید آتا خاہوت آتا راجی آسودہی محکمہ پولیس نا اولیت آتیٹی اوار ءِ۔ اوپارے کہ شاری تا جان ومال انا رکھ بلوچستان پولیس نا اولیت ءِ، ڈوہ تا چٹفنگ کن کل دوئی وسیلہ غاتے کاریم اٹ اتنگ انگ ءِ۔ اوتعلقدار افسر آتے کسبی ڈوہدار زموار آتا برخلاف کارروائی تے پین گچین کننگ، پولیس گشت انا نظام ءِ گچین جوڑ کننگ و الس تون رابطہ غاتے مونی دننگ نا پارت کرے۔ آئی جی پولیس سٹی تھانہ کیچ انا ہم دورہ ءِ کرے، ہراڑے او تھانہ نا ریکارڈ، انتظامی باندات و دوئی آسراتی تا جاچ ءِ ہلک و السی خذمت نا آب ءِ پین گچین جوڑ کننگ نا پارت کرے۔ داوخت آ اوگچین کارکڑد نادرشانی ءِ کروک آ پولیس کارندہ غاتیٹی سفتی سند بشخا و اوفتا فرض شناسی، دیانتداری و کسبی خذمت آتا ستاءِ کرساپارے کہ دیانتدار و خواری کش کارندہ غاک محکمہ پولیس نا نہادی میرات ءُ۔ آئی جی پولیس بلوچستان محمد طاہر مچ آ صوبہ ٹی امن و ایمنی، شاری تا رکھ و کانود نا بالادستی ءِ پک کننگ نا ارادگی نا درشانی ءِ کرے۔