دہشت گردی نا برخلاف سرسہب آپریشن آ سیکورٹی فورس آک ستا کڑزرہ،وزیراعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی بلوچستان اٹی بھارتی کاٹم خواجہی ٹی کاریم کروک دہشتگرد آتا برخلاف سرسہب آپریشن تیا سیکورٹی فورس آتے خراجِ تحسین پیش کرسا پارینے کہ 17 دہشتگرد ءِ خلسا ملک دشمن آتا پراگندہ ارادہ غاتے بے سہب جوڑ کننگ سیکورٹی فورس آتا کسبی چاہنداری‘ بہادری و گچین حکمت عملی نا شاہدی ءِ۔ وزیراعلیٰ پارے کہ دہشت گردی نا برخلاف جنگ اٹی سیکورٹی فورس آتا قربانی و سرسہبیک مچ آ قوم اکن گمر نا سوب ءُ۔ دہشتگرد آک بلوچستان اٹی بے ایمنی تالان کننگ و الس نا امن و آسودہی ءِ نسخان رسیفنگ نا پد اٹی ءُ، ولے ریاستی ادارہ غاک اوفتا ارادہ غاتے بے سہب کننگ کن پورو واک و ارادگی اٹ کاریم کننگ ءُ۔ میر سرفراز بگٹی دہشتگرد آتتون بہادری اٹ مون ترسا شہید مروک سپاہی حکمت اللہ ءِ خراجِ عقیدت پیش کرسا پارے کہ سپاہی حکمت اللہ وطنِ عزیز کن تینا جان ءِ ندر کرسا فرض شناسی، جیرت و حب الوطنی نا بڑزکو کہولی درور اس پک کرے۔ قوم تینا دا بہادر آ مار انا قربانی ءِ مدام یات تخک۔ او پارے کہ سیکورٹی فورس آتا بہادر آ افسر و ورناک قوم انا شرفمند آ میرات ءُ، ہرافک تینا ساہ تا پرواہ ءِ کپرسا ملک انا دفاع و الس نا رکھ اکن کاریم کننگ ءُ۔ اوفتا قربانیک قومی تاریخ نا قابلِ گمر بشخ اسے ءُ۔ وزیراعلیٰ پارے کہ بھارتی کاٹم خواجہی ٹی کاریم کروک دہشتگرد آتا پورو چٹفنگ اسکان کارروائیک برجا سلرہ و بلوچستان اٹی امن و سوگوی نا برخلاف اسہ سازش ءِ ہم سرسہب مننگ کن النگپک۔ میر سرفراز بگٹی پارے کہ دہشت گردی نا برخلاف جنگ اسہ ادارہ اسے نا آخا بلکہ مچ آ قوم انا اسیجائی جنگ ءِ۔ قوم تینا سیکورٹی فورس آتتون اوار سلک و شہید آتا قربانی تے زیان مننگ کن الیپک۔ بلوچستان اٹی مدامگی امن، الس نا جان و مال انا رکھ و ریاست نا بالادستی کن کل المی گام گیج آتے برجا تخنگک۔