صنفی بریبری نا شون تننگ کن پالیسی سازی و ادارہ ئی شریداری المی ءِ،ڈاکٹر ربابہ خان بلیدی

کوئٹہ، صوبائی سلاہکار زالبول شونداری ڈاکٹر ربابہ خان بلیدی پارینے کہ زالبول آتے تعلیم، جانجوڑی‘ روزگار، زرگزرانی وتواجہی و فیصلہ سازی نا عمل اٹی بریبر وارخواہی فراوان کننگ مدامگی راجی و زرگزرانی شونداری کن المی ءِ‘ صنفی بریبری نا شون تننگ کن بیرہ پالیسی و پڑو تیا سیبو کننگ نا جاگہ غا پک گوشوارہ، شاہدی تیا تالان ڈٹ بندی و ادارہ ئی کہول آ گچین گام گیج آتے پک کروئی تمک۔ دا خیال آتا درشانی ءِ او اقوامِ متحدہ نا ادارہ یو این ایف پی اے، محکمہ زالبول شونداری حکومت بلوچستان، نیشنل کمیشن آن دی اسٹیٹس آف ویمن و یونیسیف نا اواری اٹ کوئٹہ ٹی بلوچستان نا تعلقدار اسٹیک ہولڈر آتیکن قومی صنفی بریبری نا نشان تا فریم ورک (National Gender Parity Indicators Framework) آ اڈ ہلوک اِرا دے ئی ہیلکاریورکشاپ آن تران کرسا کرے۔ ڈاکٹر ربابہ خان بلیدی پارے کہ قومی صنفی بریبری نا نشان تا فریم ورک زالبول و نرینہ غاتا نیام اٹی جتا بشخ آتیٹی ساڑی فرق انا نشاندہی، پیشرفت نا پیمائش و پالیسی سازی ءِ قابلِ عمل جوڑ کننگ کن اسہ اہم ءُ کمک اسے‘ دا فریم ورک نا کمک اٹ تعلیم، جانجوڑی‘ زرگزرانی وارخواہی، سیاسی بشخ ہلنگ، کماشی و فیصلہ سازی تون اوار جتا جتا بشخ آتیٹی صنفی بریبری نا حالیت نا منظم جاچ ہلنگ مننگ کیک۔ او پارے کہ بلوچستان اٹی زالبول آتے مون تروک راجی، زرگزرانی و تعلیمی چیلنج آتے مون آ تخسا قابلِ پت صنفی گوشوارہ غاتا اہمیت پین ودک‘ صوبہ نا شاری و خلقی علاقہ، جتا جتا ضلع و راجی تپہ غاتا نیام اٹ ساڑی فرق ءِ چکار اٹی تخسا ہندن ءُ پالیسی جوڑ کننگ نا گرج ءِ ہرافک ڈغاری راستی تا درشانی ءِ کیر و زالبول آتے عملی وڑ اٹ شونداری نا بریبر وارخواہیک فراوان کننگ مریر‘ سلاہکار زالبول شونداری پارے کہ پاکستان بیورو آف اسٹیٹسٹکس نا لیبر فورس سروے 2020-21 نا رِد اٹ بلوچستان اٹی 15 سال آن زیات وئی انا آبادی ٹی زالبول تا لیبر فورس اٹی بشخ ہلنگ نا کچ کساس 8 درسَد وخت اس کہ نرینہ غاتا کچ 43.6 درسَد ریکارڈ کننگانے، ہرا زالبول آتا زرگزرانی اواری نا بابت ساڑی بھلا فرق انا نشاندہی ءِ کیک۔ ہندا وڑ بلوچستان نا صنفی بریبری رپورٹ 2024 ہم زالبول آتا زرگزرانی سرجز آتیٹی بشخ ہلنگ و روزگار نا وارخواہی تے ودفنگ نا گرج ءِ پیدوار کیک۔ او پارے کہ زالبول آتا زرگزرانی وتواجہی کن کسب کاری نا ہیلکاری، کاروبار نا وارخواہی، مالی وسیلہ غاتسکان رسینگ گیگ، رکھوک کاریم نا چاگڑد و زالبول آتیکن گچین ادارہ ئی آسراتی تا فراوانی المی ءِ۔