پولیو تور مہم نا دے تیٹی بھرمی چاروکی ءِ اولیکو اولیت اٹ اوار کننگے،محمدرمضان پلال

اُستا محمد، ڈپٹی کمشنر اُستا محمد محمد رمضان پلال پولیو آفیسر ڈاکٹر خلیل مستوئی تون اوار نومبر نا SNID پولیو تورمہم نا رد اٹ برجا سرجز آتا چاروکی نا رد اٹ یونین کونسل خانپور نا دورہ ءِ کرے۔ دورہ نا وخت آ او ایریا ٹرانزٹ پوائنٹ نا جم دورہ ءِ کرے ہراڑے تعینات پولیو ٹیم تا کارکڑد، فیلڈ ایریا انچارج آتا چاروکی، چناتے پولیو آن بچفنگ نا پڑی کنفنگ نا بست وبند و مہم نا جم انتظامی باندات آتا جاچ ءِ ہلک۔ دا وخت آ ڈپٹی کمشنر برجا پولیو مہم و ٹرانزٹ پوائنٹ آ چناتے رکھی پڑی کنفنگ نا عمل نا ہم جاچ ءِ ہلک و پولیو ٹیم تا حاضری، مائیکرو پلان آ عملدرآمد و چناتا کوریج تون تعلقدار معلومداری دوئی کرے۔ او تعلقدار افسر آتیاں مہم اٹ مون تروک ویل و اوفتا ایسری کن کروک گام گیج آتا بابت ہم سوج کرے‘ ڈپٹی کمشنر محمد رمضان پلال تعلقدار افسر و فیلڈ مانیٹرنگ ٹیم تے پارت کرے کہ پولیو تور مہم نا وخت آ بھرمی چاروکی ءِ اولیکو اولیت تننگے و ہر کہول آ زمواری و سنبرینگوک وڑ اٹ زمواری تے سرایتر۔ او پیدوار کرے کہ مہم نا سرسہبی کن المی ءِ کہ ہر علاقہ ٹی تعینات پولیو ٹیم تا کارکڑد نا پدریسہ مانیٹرنگ کننگے، اسہ چنا اس پولیو آن بچفنگ نا رکھی پڑی تیان محروم سلپ و سلوک آ چناتے دمدستی وڑ اٹ کور کننگے۔ او مستی پارے کہ پولیو کون آ ہلوک ناجوڑی نا پورو چٹفنگ کن کل تعلقدار محکمہ، پولیو ورکر و مانیٹرنگ افسر آتے رابطہ و مربوط حکمت عملی نا رد اٹ کاریم کروئی تمک تاکہ آخبت نا نسل تے دا خطرناک آ ناجوڑی آن رکھوک جوڑ کننگ مرے۔