شاری تے کن رکھوک سفر ءِ پک کننگ انتظامیہ نا زمواری تیٹی اوار ءِ،سائرہ عطاء

لسبیلہ، کمشنر لسبیلہ ڈویژن نا کماشی ٹی اہم دیوان اس اڈہلک‘ آر سی ڈی شاہراہ غاشکست آتا کچ انا ڈیٹا کلیکشن کمیٹی جوڑ کننگ نا فیصلہ۔ حب کمشنر لسبیلہ ڈویژن سائرہ عطاء نا کماشی ٹی لیڈا کانفرنس ہال اٹی دیوان اڈ ہلک، ہراٹی ڈی سی لسبیلہ حمیرا بلوچ، ایس پی لسبیلہ نجیب پندرانی، ایس پی حب مرزا بلال حسن، اے ایس پی عدنان بشیر، ایس پی نیشنل ہائی وے و موٹروے پولیس، ضلع حب و لسبیلہ نا ضلعی ناظمِ جانجوڑی و ریسکیو 1122 نا مانیٹرنگ افسر دھنیش کمار، لیاری و وندر نا ریسکیو انچارج وسیم و فاروق ہم ساڑی ئس دیوان اٹی اوتھل زیرو پوائنٹ شکست نا سوب و آخبت اٹی دا وڑ انا واقعہ غاتا توننگ نا بابت میکانزم ٹہیفنگ نا فیصلہ کننگا۔ ریسکیو 1122 و نیشنل ہائی وے و موٹروے پولیس کمامدار آک بریفنگ اٹی پاریر کہ زیرو پوائنٹ شکست نا دمدستی ریسکیو آپریشن بنا کننگاسس۔ دیوان اٹی پاننگا کہ بلوچستان اٹی 39 ریسکیو ہند ءُ ہرافتیان پنچ ریسکیو ہند ضلع لسبیلہ و حب اٹی ءُ، برجا تُو اکتوبر اسکان 204 مسافر آتے ٹریفک شکست آتیٹی ریسکیو فرسٹ ایڈ ترسا جاگہ غا اوفتا ساہ تے بچفنگا۔ دیوان نا شریدار آک آر سی ڈی ہائی وے آ پی ٹی کنٹریکٹر نا کنڈ آن مشینری نا ہائی وے آ غلط پارکنگ، ڈیور آتا اوورٹیکنگ ءِ شکست آتا بنداوی سوب گوندار۔ دا رد اٹ فیصلہ کننگا کہ ایف ڈبلیو او موٹروے و ڈسٹرکٹ ایڈمنسٹریشن نا جوائنٹ میٹنگ زوت بٹنگے۔ دیوان اٹی اہم فیصلہ غاتا منظوری تننگا کہ پبلک ٹرانسپورٹ نا انٹری جاگہ غاتیان مسافر آتا اوورلوڈنگ نا روک تھام کننگک، دا رد اٹ دمدستی وڑ اٹ ٹرانسپورٹر آتتون میٹنگ اڈ تننگک و اوفتے پابند کننگک کہ او تینا گاڈی تیان ہیوی سرچ لائٹ آتے دمدستی وڑ اٹ اینک کیر۔ کمشنر لسبیلہ ڈویژن پارے کہ شاری تیکن رکھوک سفر ءِ پک کننگ و اوفتا ساہ انا سلامتی انتظامیہ نا زمواری تیٹی اوار ءِ، اگہ ٹرانسپورٹر اس آرٹی اے ایکٹ نا خلاف ورزی کرے تو اونا برخلاف کارروائی مریک۔ کمشنر لسبیلہ آر سی ڈی ہائی وے آ موٹر سائیکل تیا پٹرول نا دننگ آ دمدستی رکھ و کریک ڈاؤن نا پرمان جاری کرے۔