کشاری دیر انا انصاف و بے سلنگ آن فراوانی اولیکو اولیت ءِ،شمس بادینی

نصیرآباد، ایگزیکٹو انجینئر پٹ فیڈر کینال شمس الملک بادینی پارینے کہ کشارگر آتے کشاری دیر انا انصاف اٹ و بے سلنگ آن فراوانی محکمہ آبپاشی نا اولیت آتیٹی اوار ءِ، پٹ فیڈر کینال نا کمانڈ ایریا ٹی دیر انا دوئی مننگ و رسینگ گیگ ءِ گچین جوڑ کننگ کن کل دوئی وسیلہ غاتے کاریم اٹ اتنگ انگ ءِ تاکہ کشارگر آتے مون تروک مشکل آتے مر کننگ مرے۔ دا خیال آتا درشانی ءِ او پٹ فیڈر کینال نا 621 آر ڈی بابا کوٹ نا دورہ نا وخت آ کرے‘ ہراڑے او نہری دیر انا فراوانی، وہنگ و بشخ و پانٹ نا نظام نا جم جاچ ءِ ہلک۔ دا وخت آ سب ڈویژنل آفیسر عبدالظاہر مینگل اودے بابا کوٹ و ایب کیب انا علاقہ غاتیٹی کشاریدیر انا ساڑی حالیت، نہری دیر انا سرکننگ و کشارگر آتے فراوان کروک دیر انا بابت جم بریفنگ تس۔ ایگزیکٹو انجینئر شمس الملک بادینی جاگہ غا ساڑی تعلقدار کارندہ غاتے پارت کرسا پارے کہ بابا کوٹ نا کشارگر آتے مون تروک دیر انا کاختی نا ویل آتے سنجیدگی اٹ ہلنگے و کشاری گرج آتے مون آتخسا دیر انا فراوانی ٹی پین ودکی کن گچین گام گیج کننگے۔ او پارے کہ کشت وکشار ملکی زرگزران اٹی تمبہ نا حیثیت تخک و پٹ فیڈر کینال تون گنڈوک ہزار آ کشارگر تا روزگار کشاری دیر انا وخت آ فراوانی تون گنڈوک ءِ، دا سوب آن نہری نظام نا چاروکی ٹی ہچ ڈیوالئی سگنگ مفک۔ او تعلقدار افسر و کارندہ غاتے پارت کرے کہ نہری دیر انا بشخ و پانٹ نا نظام ءِ شفاف و گچین جوڑ کننگے، ٹیل انا کشارگر تسکان دیر انا رسینگ گیگ ءِ پک کننگ آ خصوصی چکار کننگے و فیلڈ اٹی ساڑی ویل آتے دمدستی وڑ اٹ ایسر کننگے تاکہ بابا کوٹ توناوار ایلو کشاری علاقہ غاتا کشارگر آک تینا فصل تا وخت آ آبپاشی ءِ کننگ کیر۔