پاکستان و قطر علاقائی امن و سوگوی کن اسیجائی اٹ کاریم کننگ ءُ،بنجائی وزیر داخلہ

دوحہ، پاکستان و قطر داخلی سیکورٹی نا بشخ اٹی ہڑتوم آ کنڈآن کمکاری ءِ پین ودفنگ‘ سیکورٹی پارٹنرشپ ءِ سوگو کننگ و علاقائی امن و سوگوی کن اسیجائی کوشست آتے برجا تخنگ آ امنا کرینو۔ دا امنائی بنجائی وزیر داخلہ محسن نقوی و قطر نا وزیرداخلہ و داخلی سلامتی فورس انا کمانڈر شیخ خلیفہ بن حمد بن خلیفہ آل ثانی نا نیام اٹی دوحہ ٹی مروک اوڑدہی ٹی مس۔ اوڑدہی ٹی داخلی سیکورٹی تون تعلقدار کیہی بشخ آتیٹی کمکاری ءِ ودفنگ، ہڑتوم آ ملک آتا وزارت داخلہ غاتا نیام اٹی رابطہ آتے سوگو کننگ و تین پہ تینی شریداری ءِ پین گچین کننگ نا باندات آ جم گپ وتران کننگا۔ اوڑدہی ٹی ڈیہہ انا ساڑی حالیت و علاقائی امن و سوگوی تون تعلقدار باندات آتیا ہم شرہ کننگا۔ ہڑتوم آ وزیرداخلہ غاک دا ارادگی نا دوارگی ءِ کریر کہ پاکستان و قطر داخلی سیکورٹی نا بشخ اٹی تین پہ تینی کمکاری ءِ سوگو کننگ و اسیجائی فائدہ غاتا شون تننگ کن اوار مرسا کاریم ءِ برجا تخرہ۔ دا وخت آ بنجائی وزیر داخلہ محسن نقوی پارے کہ پاکستان و قطر علاقائی امن و سوگوی کن اوار مرسا کاریم کننگ اٹی ءُ و ہڑتوم آ ملک آتا نیام اٹی سیکورٹی کمکاری ءِ پین سوگو جوڑ کننگ نا بھلو گنجائشت اس ساڑی ءِ۔ قطری وزیر داخلہ شیخ خلیفہ بن حمد بن خلیفہ آل ثانی پارے کہ قطر پاکستان تون تینا تعلقداری تے بھاز اہمیت ایتک۔ او ہڑتوم آ ملک آتا نیام اٹی کمکاری و شریداری ءِ پین سوگو کننگ نا ارادگی نا درشانی ءِ کرے۔ اوڑدہی ٹی دا ہیت آ امنا کننگا کہ ہڑتوم آ وزارت داخلہ غاتا نیام اٹی کمکاری ءِ پین سوگو کننگک و داخلی سیکورٹی تون تعلقدار بشخ آتیٹی تین پہ تینی شریداری ءِ شون تننگک۔ پاکستان و قطر نا نیام اٹی سیکورٹی کمکاری ءِ سوگو کننگ آن ہڑتوم آ ملک آتا تعلقداری تے پین ودفنگ و علاقائی امن و سوگوی نا اسیجائی ہدف آتے دوئی کننگ اٹ کمک رسینگ نا اومیت ارے۔