مولانا فضل الرحمن نا بلوچستان ءِ خیبرپختونخوا تون بیٹ تننگ جوان اف،صوبائی وزیر داخلہ ضیا لانگو

کوئٹہ، صوبائی وزیر داخلہ میر ضیاء اللہ لانگو بلوچستان نا حالیت آتے خیبرپختونخوا تون بیٹ تننگ و مولانا فضل الرحمان نا بیان تیا تنقید کرسا پارینے کہ بلوچستان تون تعلقدار گمراہ کروک بیان تننگ اٹی ءِ حکومت بلوچستان دہشت گردی نا برخلاف جنگ اٹی سیکورٹی فورسز آتتون ہم کوپہ سلوک ءِ و ساڑی حالیت آتیٹی ریاست نا کمک کننگ المی ءِ۔ کوئٹہ ٹی کمکار حوالکاری و سیاسی باندات شاہد رند و ایڈیشنل چیف سیکرٹری داخلہ حمزہ شفقات تون اوار پریس کانفرنس کرسا میر ضیاء اللہ لانگو پارے کہ بلوچستان نا خیبرپختونخوا تون بیٹ تننگ جوان اف، مولانا فضل الرحمان نا جماعت ہم دہشت گردی نا گواچی مننگ اٹی ءِ‘ ہندا سوب آن اونا کنڈ آن بلوچستان و سیکورٹی فورس آتیا تنقید مذمت ناقابل ءِ‘ او پارے کہ دہشت گردی نا چٹفنگ کن سیکورٹی فورسز آتے حکومت نا کمک نا گرج مریک، اگہ خیبرپختونخوا حکومت قومی ایکشن پلان آ عملدرآمد کن بنجائی حکومت و سیکورٹی فورس آتتون کمک کریکہ تو ایمرجنسی نا گرج پیش بتوکہ، ساڑی حالیت آتا خواست دادے کہ کل واک آک ریاست تون ہم کوپہ سلر تاکہ ملک ءِ مشکل آتیان کشنگ مرے۔ کمکار حوالکاری وسیاسی باندات شاہد رند پارے کہ خیبرپختونخوا ٹی مائنز اینڈ منرلز ایکٹ منظور مفننگ نا سوب آن حکومت ءِ چٹنگ نا گمان سہی اف‘ بلوچستان اٹی دا کانود نا اولسر جاچ ءِ ہلنگ انگ ءِ و دا رد اٹ اپوزیشن جماعت آتے سلاہ ٹی ہلنگ انگ ءِ‘ شاہد رند پارے کہ بلوچستان اٹی دہشت گردی نا برخلاف کانود سازی وزیراعلیٰ اپوزیشن ءِ سلاہ ٹی ہلسا کرے‘ تدوک آ اِرا سال اٹ حکومت سیکورٹی فورس آتتون اوار مرسا دہشت گردی نا برخلاف کارروائی کرے۔ او پارے کہ خیبرپختونخوا ٹی ایمرجنسی باندات نا پد اٹ وزیراعلیٰ نا کنڈ آن اسلام آباد نا کنڈ آ مارچ کننگ نا کوشست آک ہم اوار ءُ، وخت اس کہ بلوچستان نا وزیراعلیٰ نا کنڈ آن دن ءُ مارچ اسے نا ہیت متنے‘ ایڈیشنل چیف سیکرٹری داخلہ حمزہ شفقات صوبہ ٹی امن و ایمنی کن کروک گام گیج آتا جم آتے پارسا پارے کہ بلوچستان اولیکو صوبہ ءِ ہراڑے دہشت گردی نا چٹفنگ کن 18 کانود منظور کننگار و 17 محکمہ جوڑ کننگانو۔ اوپارے کہ فیس لیس عدالت آک جوڑ کننگانو، ہراڑے 90 بندغ نا مقدمہ غاک درج کننگانو۔ حمزہ شفقات نا رِد اٹ تدوک آ اِرا سال اٹی 60 ہزار آن زیات انٹیلی جنس بیسڈ کارروائی، چھاپہ و ایلو گام گیج آک کننگار، دا کارروائی تیٹی 450 دہشت گرد دزگیر وخت اس کہ 1100 خلنگار۔ او مستی پارے کہ دا وخت اٹ پولیس تون اوار سیکورٹی فورس آتا 300 آن زیات افسرو کارندہ شہید مسر، وخت اس کہ دہشت گردی نا واقعہ غاتیٹی 551 بے گناہ بندغ ہم زوال مسر۔