میڈان پاکستان ءِ جہانی آب آتا چیدہ جوڑ کننگ کن گام گیج کروئی ءِ،پروفیسر احسن اقبال

اسلام آباد، بنجائی وزیر ڈٹ بندی، شونداری و خصوصی گام گیج پروفیسر احسن اقبال پارینے کہ پاکستان نا یونیورسٹی تے ملک انا زرگزرانی شونداری نا انجن جوڑ مروئی مریک، تعلیمی ادارہ و صنعت نا نیام اٹ سوگو رابطہ جوڑ کرسا پوسکنوڑ‘ پٹ وپول و ٹیکنالوجی نا مونی دننگ ءِ پک کروئی مریک تانکہ ’میڈاِن پاکستان‘مچ آ دنیا ٹی آب انا چیدہ جوڑ مننگ کے۔ نیشنل یونیورسٹی آف سائنسز اینڈ ٹیکنالوجی (نسٹ) نا ماسٹرز کانووکیشن اٹی خاص انگا مہمان ناوڑ اٹ بشخ ہلسا بنجائی وزیر گریجویٹس، استاد و خاص وڑ اٹ لمہ وباوہ ءِ دا اہم سرسہبی تیا مبارکبادی پیش کرے۔ پروفیسر احسن اقبال پارینے کہ 1990 نا دہائی ٹی ہراتم او ڈپٹی چیئرمین پلاننگ کمیشن نا حیثیت اٹ نسٹ انا اسلام آباد کیمپس نا منظوری نا ریسہ غاتون اوار ئس تو اونا پکا یخین ئس کہ پاکستان ءِ جہانی آب انا ہندن ءُ یونیورسٹی اسے نا گرج ءِ ہرا پوسکن آ تعلیم، پٹ وپول و ٹیکنالوجی نا مونی دننگ اٹ نمان کڑد ادا کننگ کے، اینو نسٹ انا سرسہبی دا وژن و فیصلہ نا عملی تعبیر ءِ۔ بنجائی وزیر پارینے کہ قیام پاکستان نا وخت آملک اتون بنداوی وسیلہ و صنعتی لائخی ہم کچ اٹ ئس داڑ اسکان سائیکل جوڑ کننگ نا لائخی ہم ساڑی الوکہ، ولے قوم انا ارادگی‘ خواری و پدریسہ جہد پاکستان ءِ دنیا نا ہفت می ایٹمی طاقت و جے ایف 17 تھنڈر کون آ پوسکن آ جنگی جہاز تیارکروک ملک جوڑ کرے۔ او پارینے کہ اینو نا دور اٹی قومی طاقت نا حقی کچ بیرہ سلہہ غاتا کوڑی اف بلکن یونیورسٹی تا لیبارٹری تیٹی مروک آپٹ وپول، پوسکنوڑ وٹیکنالوجی ٹی پیشرفت ہم ارے، علم آ تالان زرگزرانی ہمو بنداو ءِ ہرانا کمک اٹ پاکستان جہانی کہول آ تینا ہند ءِ پین سوگو کننگ کیک۔ پروفیسر احسن اقبال زور شاغا کہ نسٹ اتون اوار مچ آملک انا یونیورسٹی تے روایتی سرجزآتیان مونی ہنسا پٹ وپول، اختراع و صنعتی گرج آتتون ہم گرنچ تعلیم آ چکار کروئی مریک۔