بنجائی وزیر واپار تون امریکی ناظم الامور نا اوڑدہی، پاکستان وامریکہ نا واپار و اقتصادی کمکاری ءِ ودفنگ نا باندات آتیا امنا

اسلام آباد، بنجائی وزیر واپارجام کمال خان تون امریکہ نا ناظم الامور نٹالی اے بیکر اوڑدہی کرے۔ ہراٹی ہڑتوم آ ملک آتا نیام اٹ ہڑتوم آ کنڈآتا واپار، زرکاری و اقتصادی کمکاری ءِ ودفنگ نا بارواٹ گپ وتران کننگا۔ سے شنبے نادے آمروک آ اوڑدہی ٹی وزیراعظم نا کوآرڈینیٹر واپار و صنعت رانا احسان افضل خان و سیکرٹری واپارجواد پال اسک ہم ساڑی ئسر۔ جاری پریس ریلیز نا رداٹ دا وخت آ وزیرِ واپارجام کمال خان پارینے کہ امریکہ تون واپاری و اقتصادی تعلقداری تے پین ودفنگ پاکستان نا اولیت آتیٹی اوار ءِ، ہڑتوم آ ملک آتا نیام اٹ واپار زرکاری و پرائیویٹ بشخ انا کمکاری نا گیشتر وارخواہی ساڑی ءِ۔ اوڑدہی ٹی پاکستانی امب و ہلار نا امریکی منڈی اسکان رسینگ نا بابت ہم سرجمی اٹ گپ وتران مس۔ سیکرٹری واپار پارے کہ پاکستان وامریکہ نا نیام اٹ تین پہ تینی واپاری معاہدہ غا برجا مذاکرات اٹی اہم پیشرفت مسنے، سلاہ ئی واپاری معاہدہ نا منہ تکنیکی ٹک آتیا امریکی واپاری نمائندہ نا دفترآن پین گپ وتران درکار ءِ۔ اوپارے کہ پاکستانی امب آتا برآمد کن امریکی جاچ ٹیم تا دورہ ٹی ترندی اتنگ نا گرج ءِ۔ بلوچستان نااِلار ءِ امریکہ نا منڈی اسکان رسینگ ملنگ آن کشارگر و برآمد کروک آتے فائدہ مریک۔ امریکی ڈل پاکستانی کشاری مصنوعات آتے مارکیٹ اسکان رسینگ تننگ نا بابت تعلقدار کمامدار آتتون رابطہ کننگ نا باوری کرفے، وخت اس کہ امریکہ غان کرپاس وسویابین نا درآمد آتے ودفنگ و واپاری مالی کمکاری نا گمان تا بارواٹی ہم گپ وتران کننگا۔