وزارت خزانہ و آئی ایم ایف نا کنڈآن پاکستان اٹ پوسکن و زرگزرانی شونداری کن بڑزکو کہولی ورکشاپ

اسلام آباد، وزارت خزانہ و جہانی مالیاتی فنڈ آئی ایم ایف نا کنڈآن پاکستان اٹ پوسکن و زرگزرانی شونداری کن گچین خراج نظام نا اصلاحات نا سرحال آ اِرادے ئی بڑزکو کہول انا ورکشاپ اس سے شنبے نادے آ بناکرے۔ اِرادے ئی ورکشاپ اٹی بڑزکو حکومتی کمامدار، آئی ایم ایف و جہانی بینک انا نمائندہ، جہانی خراج چاہندار، تعلیم نا چاہندار و پرائیویٹ بشخ انا سرکڑدہ غاک بشخ ہلنگ ءُ۔ ورکشاپ اٹ پاکستان نا خراج نظام ءِ پوسکن جوڑ کننگ و مدامگی اقتصادی شونداری ٹی اونا کڑد ءِ سوگو کننگ نا بابت اہم اولیت آتیا گپ وتران کننگک۔ ورکشاپ اٹ شش اہم سرحالی نشست مریک، ہرافتے ٹی خراج و اقتصادی شونداری، پاکستان نا خراج نظام ءِ پوسکن جوڑ کننگ، بنجاء و صوبہ غاتیٹی اسہ وڑ انا سیلز خراج نظام نا جوڑ کننگ، زیات سادہ و بے کنڈ ہلوک انکم خراج نظام، خراج نظام نا انتظامی باندات‘ ڈیجیٹلائزیشن و خراج تروک آتا پت، ہندن مالیاتی وفاقیت و صوبائی خراج بنگ آک اوار ءُ۔ دا نشست آتیٹی اسہ بھلو، انصاف اٹ، سادہ و سوگو و شفاف خراج نظام نا جوڑ کننگ آ سجفنگک، ہرا بنگ آتیٹی ودکی، زرکاری، کاروبار ی ودفنگ و پیداواری لائخی نا مونی دننگ اٹ کمکار مرے۔ ورکشاپ نا اولیکو دے بنائی سیشن اٹی دیوان اٹ بنجاہی وزیر خزانہ و بنگکاری سینیٹر محمد اورنگزیب، آئی ایم ایف نا نیامی دے ٹک و نیامی ایشیانا ڈائریکٹر جہاد ازور، و آئی ایم ایف نا مالیاتی باندات نا بشخ مالیاتی باندات نا ڈائریکٹر روڈریگو والڈیز بنائی گپ وتران کریر۔ اِرادے ئی ورکشاپ اٹی اقتصادی شونداری نا مونی دننگ کن گچین خراج پالیسی، پاکستان نا خراج نظام ءِ پوسکن جوڑ کننگ نا گرج، بنجاو صوبہ غاتیٹی اسہ وڑ انا سیلز خراج نظام نا جوڑ کننگ و نفاذ، زیات سادہ و بے کنڈ ہلوک انکم خراج نظام نا کنڈ آ پیشرفت و گچین وڑوڈول نا رداٹ خراج نظام نا انتظامی کاریم‘ ڈیجیٹلائزیشن، خراج کانود آتا پوروی و خراج تروک آتا پت اتون اوار اہم سرحال آتیا گپ وتران کننگک۔