دہشتگردی نا چٹفنگ کن سیاستدان آتے زمواری نا درشانی کروئی تمک،شیرافضل مروت

اسلام آباد، قومی اسمبلی نا باسک شیرافضل مروت پارینے کہ ہراتم اسکان سیاستدان و سیاسی جماعت آک میڈیا نا مون آ برسا دہشتگردی نا آجوئی اٹ مخالفت ءِ کپسہ و اونا برخلاف جنگ اٹی تینا زمواری ءِ قبول کپسہ، ہموتم اسکان ملک آن دہشتگردی نا چٹفنگ مننگ کپک‘ سے شنبے نادے آ پارلیمنٹ ہاؤس نا پیشن میڈیا ہیت وگپ کرسا شیر افضل مروت پارے کہ دہشتگردی نا برخلاف جنگ اٹی سیاستدان و سیاسی جماعت آتے تینا پیدوار موقف ءِ پیش کروئی مریک و دابابت عملی زمواری ءِ ہم امنا کروئی مریک۔ اوپارے کہ ہراتم اسکان سیاسی سرکڑدہ غاک دا باندات آ یکجا مرسا تینا کڑد ءِ ادا کپس، دہشتگردی آن زوت خلاصی دوئی کننگ نا اومیت کننگ مفک۔ اوگچین مروک آ السی نمائندہ غاتا پیشن نا ملک سفر و بلیو پاسپورٹ نا باندات آ گپ وتران کرسا پارینے کہ پارلیمنٹ نا گچین مروک آ باسک آک السی و حکومتی باندات آتا رد اٹ سفر کیرہ۔ اگہ باسک اس تینا جندی خڑچ آ پیشن نا ملک آ کاہک تو اوڑا اعتراض نا سوب سمجھ آن پیشن ءِ۔ شیر افضل مروت پارینے کہ اسہ کنڈآ گریڈ 18 نا افسر نا بلیو پاسپورٹ آ اعتراض کننگپک، وخت اس کہ ایلو کنڈآ پارلیمان اٹ تولوک آ الس نا گچین مروک آ نمائندہ غاتا پیشن نا ملک سفر آ سوج کننگک حالانکہ گچین مروک آ نمائندہ غاتے ہم سرکاری و السی باندات آتا رد اٹ سفرکروئی تمک۔ او دہشتگردی نا ویل آ سیاسی سرکڑدہ غاتا پیدوار موقف و اسیجائی زمواری نا گرج آ زور شاغسا پارینے کہ دا چیلنج تون مون تننگ کن سیاست دان تے مونی برسا تینا کڑد ءِ ادا کروئی مریک۔