بلوچستان قدرتی وسیلہ و زرگزرانی گمان تیان شُپ ءُ صوبہ اسے،نسیم الرحمان خان

گوادر، وزیراعلیٰ بلوچستان میر سرفراز بگٹی نا سلاہکار چاگڑد و موسمیاتی بدلی نسیم الرحمن خان ملاخیل گوادر فری زون اٹی شہزاد اینڈ شاؤ فارم پرائیویٹ لمیٹڈ نا بناءِ کرے۔ ڈٹ انا رد اٹ ساہدار سانبنگ‘ سُو انا پوسکنوڑ پروسیسنگ و پیشن ملک برآمد آتے شون تننگ نا ہدف تخنگانے، ہراڑان بلوچستان اٹی زرکاری، صنعتی و واپاری سرجز تا شون تننگ و روزگار نا پوسکن آ وارخواہی تا ودی کننگ نا گمان آک ودرہ‘ بنائی دود اٹی بنجائی سیکرٹری میری ٹائم افیئرز محمد خرم آغا، چیئرمین گوادر پورٹ اتھارٹی نورالحق بلوچ، پنجاب اسمبلی نا باسک و رکن چیف منسٹر انسپکشن ٹیم تحسین فواد، سی پیک کوآرڈینیٹر اسلام آباد زارا، سی پیک پروجیکٹ ڈائریکٹر ڈاکٹر شہزاد، وزارت غذائی رکھ و پٹ وپول نا ڈاکٹر شہلحن، ڈائریکٹر جنرل، اسلام آباد چیمبر آف سمال ٹریڈرز نا مسکوہی سیکرٹری خلیل احمد، مسکوہی نائب صدر واجدہ سلیم و ایلو کمامدار و متبر آک بشخ ہلکر۔ دود اٹ خاص انگا مہمان نسیم الرحمن خان ملاخیل بنائی فیتہ ءِ کاٹ کرے و ایلو مہمان تتون اوار فارم نا دورہ ءِ کرے۔ دا وخت آ شریدار آتے ڈٹ انا سلاہ ئی سرجز آتا بابت بریفنگ تننگا۔ تران کرسا صوبائی سلاہکار پارے کہ بلوچستان قدرتی وسیلہ و زرگزرانی گمان تیان شُپ ءُ صوبہ اسے، ہراڑے پرائیویٹ بشخ انا شریداری اٹ زرکاری و صنعتی شونداری ءِ پوسکن ءُ کنڈ اس تننگ مریک‘ او پارے کہ گوادر فری زون و چین پاکستان اقتصادی راہداری (سی پیک) تون گنڈوک ڈٹ آک بلوچستان نا زرگزرانی شونداری، واپاری و برآمد آتا شون تننگ اٹ اہم کڑد ادا کننگ کیرہ۔ او مستی پارے کہ لائیو اسٹاک و سُو انا پروسیسنگ اٹی زرکاری آن ہندی پیداوار نا زرگزرانی قدر ءِ ودفنگ، روزگار نا وارخواہی تا ودی کننگ و صوبائی زرگزران ءِ سوگو کننگ اٹی کمک رسینگک‘ گوادر نا جغرافیائی اہمیت و بندرگاہی آسراتی تیان فائدہ ہرفسا بلوچستان ءِ جہانی واپاری منڈی تتون گچین وڑ اٹ گنڈنگ مننگ کیک۔