ایران ایٹمی پروگرام دوارہ بنا کپننگ کن پک ءُ ضمانت اس مونی اتے، جے ڈی وینس

واشنگٹن، امریکی نائب صدر جے ڈی وینس پارینے کہ امریکہ ایران نا برخلاف جنگ اٹی منہ پہلو تیا فیصلہ ئی سرسہبی دوئی کرینے و ایران نا جوہری پروگرام ءِ بھس کننگانے، ولے واشنگٹن داسہ تہران آن مریس وختی پک کروک ضمانت خواہک کہ او تینا جوہری پروگرام ءِ دوارہ بحال کپک۔ الجزیرہ نا رپورٹ نا رِد اٹ جے ڈی وینس سی بی ایس نیوز نا کنڈآن اڈتروک اسہ السی نشست اسے آن تران کرسا پارے کہ امریکہ نا چکار دا ہیت ءِ پک کننگ آٹے کہ ایران بروک آ سال تیٹی دوارہ جوہری سلہہ ٹہیفنگ یا یورینیم نا افزودگی نا لائخی ءِ بحال کننگ نا کوشست کپک۔ امریکی نائب صدر سوج چست کرے کہ مگہ ڈونلڈ ٹرمپ نا ساڑی انتظامیہ غان پد، پنچ سال گدرینگ انگ آ ایران دوارہ جوہری سلہہ تا کوڑی یا یورینیم افزودگی نا لائخ جوڑ مننگ نا کوشست کننگ کیک؟ او پارے کہ امریکہ ایران آن ہندن مریس وختی باوری خواہک ہرادے پک ہم کننگ مرے۔ وینس نا بیان آن پیدوار مریک کہ واشنگٹن کن باندات بیرہ ایران نا ساڑی جوہری میرات آتے نسخان رسیفنگ اسکان کچ اٹ اف بلکہ آخبت اٹی دا پروگرام نا بحالی ءِ توننگ کن پک کروک بست وبند آک ہم اہم ءُ۔ ایلو کنڈ آن ایران بھلو وخت اسے آن جوہری سلہہ ٹہیفنگ نا ارادہ نا تردید ءِ کرسا بسنے۔ تہران نا موقف ءِ کہ اودے بجلی نا پیداوار، طبی پٹ وپول و ایلو پرامن مسخت آتیکن جوہری پروگرام چلیفنگ نا حق ارے۔