حکومت کنشت نا آب انا گچینی آ چکار کننگ ءِ، میر ظہور بلیدی

کوئٹہ، صوبائی وزیر ڈٹ بندی و شونداری میر ظہور احمد بلیدی پارینے کہ انسانی زند اکن کنشت بنداوی اہمیت تخک، وخت اس کہ خالص، رکھوک و آب اٹو کنشت نا فراوانی وخت انا اہم ءُ گرج اسےِ۔ حکومت کنشت نا آب و رکھ ءِ پک کننگ کن پوسکنوڑ ٹیکنالوجی نا کاریم اٹ اتنگ و کشاری بشخ انا شونداری آ چکار کننگ اٹی ءِ۔ دا خیال آتا درشانی ءِ او جہانی یومِ کنشت نا وخت آ بلوچستان ایگریکلچر کالج، بلیلی روڈ کوئٹہ ٹی اڈ ہلوک اولیکو بلوچستان فوڈ ایگزیبیشن 2026ء نا بنائی دود آن تران کرسا کرے۔ صوبائی وزیر فیتہ ءِ کاٹ کرسا اِرا دے ئی نمائش نا بناءِ کرے و جتا کشاری گڑاتا اسٹال آتا دورہ ہم کرے۔ میر ظہور احمد بلیدی پارے کہ بلوچستان نا گیشتری بشخ خشک و کم پرّ کروک علاقہ غاتیا تالان ءِ، ولے صوبہ نا کیہی علاقہ غاک تینا کشاری پیداوار نا سوب آن فوڈ باسکٹ نا وڑ اٹ چاہنگرہ‘ کشت وکشار نا بشخ اٹی پین پیشرفت کن دیر انا وسیلہ غاتا گچین کاریم اٹ اتنگ، آبی کوڑی تا تفنگ و پوسکنوڑ کشاری وڑ و ڈول آتے تینائی کننگ المی ءِ۔