پولیس نا است بڈی و ستا کن دود،گورنر خیبرپختونخوا نا پولیس نا تنخواہ، شہید آتا پیکیج و آسودہی تیٹی ودکی نا پڑو

پشاور، گورنر خیبرپختونخوا فیصل کریم کنڈی صوبہ ٹی پولیس کارندہ غاتا تنخواہ و آسراتی تیٹی ودکی، پولیس شہید آتا خاہوت آتیکن خصوصی مالی کمک و نفری نا کمتی ءِ مر کننگ کن خورک اسامی تیا بھرتی تا عمل ءِ تیز کننگ نا پڑو ءِ کرینے۔ او پارے کہ خیبرپختونخوا پولیس نا تنخواہ بایدے ایلوصوبہ غاتیان زیات مریر تاکہ دہشت گردی نا برخلاف جنگ اٹی خذمت سر تروک پولیس کارندہ غاتا قربانی و زمواری تا جوان امنائی مننگ کے۔ گورنر ہاؤس پشاور اٹی اڈ ہلوک دود اٹ فیصل کریم کنڈی 54 پولیس شہید آتا وارث آتیٹی پلاٹ آتا الاٹمنٹ لیٹر بشخا۔ دود اٹی پولیس شہید آتا خاہوت، بڑزکو کمامدار و پولیس افسر آک ساڑی ئسر‘ دود آن تران کرسا گورنر خیبرپختونخوا پارے کہ پولیس کاندہ غاک صوبہ ٹی امن ایمنی و دہشت گردی نا برخلاف جنگ اٹی اہم کڑد ادا کننگ اٹی ءُ۔ اوفتا خذمت و قربانی تا رد اٹ پولیس نا تنخواہ، مالی آسراتی و شہید آتا خاہوت آتا آسراتی و آسودہی آ خصوصی چکار کننگ نا گرج ءِ۔ فیصل کریم کنڈی پولیس نفری نا کمتی ءِ مر کننگ کن خورک اسامی تیا بھرتی تا عمل ءِ تیز کننگ نا ارادگی نا درشانی ءِ ہم کرے۔ او پارے کہ پولیس نا واکداری کچ اٹی ودکی و کارندہ غاتے المی آسراتی تا فراوانی آن امن و ایمنی نا حالیت ءِ گچین کننگ اٹی کمک رسینگ کیک۔ دا وخت آ دہشت گردی نا واقعہ غاتیٹی زوال مروک پولیس کارندہ غاتا خاہوت آتیکن خصوصی مالی کمک نا پیکیج و شہید آتا مسن تا برام کن خصوصی گرانٹ نا پڑو ہم کننگا۔ دا گام گیج آتا مسخت شہید آتا خاہوت آتے مالی رکھ فراوان کننگ و اوفتے مون تروک مشکل آتیٹی کمک کننگ ءِ۔ دود اٹی انسپکٹر جنرل پولیس خیبرپختونخوا ذوالفقار حمید، چیف سیکرٹری، پولیس افسر، ایڈوائزری کونسل نا باسک و پولیس شہید آتا خاہوت آک بشخ ہلکر۔ پولیس شہید آتا خاہوت آتے ٹی پلاٹ آتا الاٹمنٹ لیٹر نا بشخ وپانٹ کننگ و مالی کمک نا پڑو آتے شہید آتا خاہوت تا آسراتی و آسودہی نا ریسہ نا اہم ءُ پیشرفت اس گوندنگا‘ ولے تنخواہ و آسراتی تیٹی ودکی، خصوصی پیکیج و برام نا گرانٹ آ عملدرآمد نا جم آتے تعلقدار کمامدار آتا کنڈ آن پیدوار کننگ سلوک ءِ۔