وزیراعلیٰ و جان جوڑی وزیر نا است جمی ،بلوچستان، پولیو دین نا ساڑی گری نا گمان تا کم مننگ خوشی نا ہیت اسے
پولیو نا چٹفنگ نا جہد برجا سلک، ناچوڑ آ ناجوڑی آن رکھنگ کن کل دوئی وسیلہ غاتے کاریم اٹ اتنگک، سرفراز بگٹی
Get real time updates directly on you device, subscribe now.
کوئٹہ، بلوچستان اٹی پولیو نا چٹفنگ نا کوشست آتیٹی اہم پیشرفت مونی بسنے، ہراڑے پولیو دین نا ساڑی گری ءِ ہُننگ کن ہلنگوک آ کل 23 چاگڑدی نمونہ غاتا نتیجہ غاک منفی بسنو۔ وزیراعلیٰ بلوچستان میر سرفراز بگٹی و صوبائی وزیر جان جوڑی بخت محمد کاکڑ اسک بیان اٹی دا پیشرفت آ است جمی نا درشانی ءِ کرسا پولیو تور کن برجاگام گیج آتے پین گچین جوڑ کننگ نا پارت کرینو۔ وزیراعلیٰ بلوچستان پارے کہ پولیو نا برخلاف جنگ اٹی دوئی مروک پیشرفت پدریسہ کوشست، گچین حکمت عملی و گچین گام گیج آتا بھرم ءِ۔ پولیو نا پورو چٹفنگ اسکان دا جہد برجاسلک و چناتے دا ناچوڑ آ ناجوڑی آن رکھنگ کن کل دوئی وسیلہ غاتے کاریم اٹ اتنگک۔ وزیر اعلیٰ پولیو تور مہم اٹی فرض اٹی تینا جان تے ندر کروک بہادر کارندہ و پولیو ورکرآتے خراج عقیدت پیش کرسا پارے کہ اوفتا قربانیک قومی خذمت نا روشنا درور ءُ۔۔ اودا ارادگی نا درشانی ءِ کرے کہ پدریسہ خواری و پبی گام گیج آتا کمک اٹ بلوچستان ءِ پولیو آن پاک کننگ نا ہدف ءِ دوئی کننگک۔ صوبائی وزیر جان جوڑی بخت محمد کاکڑ پارے کہ بلوچستان اٹی کل 23 چاگڑدی نمونہ غاتا منفی بننگ مسہ سال انا پدریسہ جہد و پولیو تور اکن کروک گچین گام گیج آتا بھرم ءِ۔ وزیراعلیٰ بلوچستان و چیف سیکرٹری بلوچستان نا پدریسہ چکار و کاٹم خواجہی ہم دا کوشست آتے گچین جوڑ کننگ اٹ اہم اہمیت تخک۔ او محکمہ جان جوڑی نا کمامدار، پولیو ورکر و لمہ و باوہ غاتا اسیجائی کوشست آتا ستاءِ کرسا پارے کہ پولیو مہم اٹی اوار کارندہ غاک دہشت گردی نا خطرہ، مشکل انگاعلاقہ، بھلا باسنی، یخ و بنداوی آسراتی تا کمتی آن پد ہم چناتسکان رسینگ ءِ پک کننگ کن تینا زمواری تے پورو کریر۔ پولیو ورکر آتے ٹھپی کننگ، برمتہ کننگ و دھڑکوتننگ کون آ واقعہ غاتیان پدہم اوفتا ارادگی و ثابت گامی ستاکڑزک۔ صوبائی وزیر جان جوڑی پولیو تور مہم اٹی جان تے ندر کروک شہید آتے خراج عقیدت پیش کرسا پارے کہ اوفتا قربانی تے مدام یات تخنگک۔ بلوچستان حکومت پولیو ورکر آتتون سلوک ءِ و اوفتا خذمت و قربانی تے شرف ایتک۔ او پارے کہ چاگڑدی نمونہ غاتا منفی نتیجہ غاک است جمی نا سوب ءُ، ولے پولیو نا پورو چٹفنگ کن پدریسہ چکار‘گچین ویکسی نیشن، پولیو ورکر آتا کمکاری و لمہ و باوہ غاتا کمکاریءِ پک کننگ المی ءِ۔ بلوچستان ءِ پولیو آن پاک کننگ اسکان کوشست آتے برجا تخنگک۔