پاکستان و روس انا منظم ڈوہ تا توننگ کن اواری اٹ کاریم کننگ آ امنا،وزیرداخلہ محسن نقوی

اسلام آباد، روس انا وزیرداخلہ ولادیمیر کولاکولتسیف بنجائی وزارت داخلہ نا دورہ ءِ کرے۔ ہراڑے او بنجائی وزیر داخلہ محسن نقوی تون اہم اوڑدہی کرے و ہڑتوم آ ملک آتا نیام اٹ ڈل آتا کہول آ سرجمی اٹ مذاکرات مس۔ مذاکرات اٹ تین پہ تینی است خواہی نا باندات‘ اسیجائی فائدہ غاتا بشخ آتیٹی کمکاری نا مون آ دننگ و سیکورٹی باندات آتیا سرجمی اٹ گپ وتران مس۔ وزارت داخلہ غان جاری بیان نا رِد اٹ دا وخت آ ہڑتوم آملک آتا نیام اٹ منظم ڈوہ تا توننگ کن اواری اٹ کاریم و معلومداری تا ہل و تس نا مفاہمتی یادداشت (ایم او یو) آ دستخط کننگ نا فیصلہ کننگا۔ ہڑتوم آ وزیر داخلہ غاک ڈوہدار تا ہل وتس (ایکسٹراڈیشن) و سزا کنوک بندغ آتا ہل و تس نا بابت معاہدہ غاتے زوت پک دروشم تننگ تون اوار ری ایڈمیشن معاہدہ غا دمدستی عملدرآمد کننگ آ امناکریر۔ داکان بیدس اینٹی نارکوٹکس فورس (اے این ایف) و روس انا تعلقدار ادارہ غاتا نیام اٹ منشیات نا اسمگلنگ نا توننگ کن کمکاری ءِ ودفنگ نا ہم فیصلہ کننگا۔ فریق آک دا ہیت آ ہم امنا کریر کہ ہڑتوم آ ملک آتا وزارت داخلہ نا ورکنگ گروپ آک زوت اسہ ایلو نا ملک انا دورہ ءِ کیرہ۔اوڑدہی ٹی پاکستان آن روس کسبکار اسکلڈ ہیومن ریسورس گدریفنگ، سیل و سواتی و پوریاگربرادری کن ویزا نا دوئی کننگ ءِ آسان کننگ، سائبر کرائم نا توننگ و نیشنل پولیس اکیڈمی اسلام آباد و روس انا پولیس اکیڈمی نا نیام اٹ ہیلکاری شریداری آ ہم سجفنگا۔ بنجائی وزیر داخلہ محسن نقوی گپ وتران کرسا پارے کہ منظم ڈوہ تا توننگ نا سلاہ ئی معاہدہ پاک روس تین پہ تینی کمکاری نا مون آ دننگ اٹ اہم ءُ مزل اس جوڑ مریک۔ او پارے کہ ویزا نظام اٹ آسانی ودی کننگ آن ہڑتوم آ قوم تا نیام اٹ السی رابطہ و واپاری سرجزآتے مونی دننگک۔ محسن نقوی پارے کہ پاکستان سائبر کرائم نا توننگ کن روس انا پوسکن تکنیکی چاہنداری و آزموندہ غاتیان فائدہ ہرفنگ خواہک۔ او پارے کہ داوخت آ کم وود 1300 پاکستانی طالب علم روس انا چندی یونیورسٹی تیٹی خواننگ ءُ و پاکستان خواہک کہ پین طالب علم بڑزکو تعلیم کن روس آ کار۔ دا وخت آ روسی وزیر داخلہ ولادیمیر کولاکولتسیف پارے کہ دہشت گردی، منشیات نا اسمگلنگ و کانود آن چَپ ہن وبر تون اوار کل وڑ انا منظم ڈوہ تا چٹفنگ کن اسیجائی و پبی گام گیج المی ءِ۔ او پارے کہ روس گچین حکمت عملی و گام گیج آتا سوب آن تینا ملک اٹ سائبر کرائم نا کچ اٹ 33 درسد نمان کمتی دوئی کرینے و او دا پڑ اٹ پاکستان تون شریداری نا خواہندار ءِ۔مذاکرات اٹ وزیر مملکت داخلہ طلال چوہدری‘ پاکستان اٹ تعینات روسی سفیر، اسپیشل و ایڈیشنل سیکریٹریز داخلہ، ڈی جی ایف آئی اے، کمانڈنٹ نیشنل پولیس اکیڈمی، آئی جی ایف سی، ڈی جی نیشنل فرانزک ایجنسی، ڈی جی این سی سی آئی اے، ڈی جی پاسپورٹ، چیف کمشنر اسلام آباد، آئی جی اسلام آباد پولیس و ایلو بڑزکو کمامدارآک ہم بشخ ہلکر۔