ڈیزائن ونگ ءِ پوسکنوڑ خواست آتتون ہمگرنچ کننگک،میر سلیم احمد کھوسہ

کوئٹہ، صوبائی وزیر مواصلات و تعمیرات میر سلیم احمد کھوسہ پارینے کہ محکمہ مواصلات و تعمیرات نا ڈیزائن ونگ ءِ پوسکنوڑ خواست آتتون ہمگرنچ کننگ وخت انا اہم ءُ گرج اسے انتئے کہ ڈیزائن ونگ محکمہ اٹی مخ انا حیثیت تخک؛ او پارے کہ پوسکنوڑ مشینری، ازباب و تکنیکی کارندہ غاتا فراوانی آن بیرہ محکمہ نا کارکڑد اٹی نمان گچین بریک بلکہ شونداری ڈٹ آتا تیاری و پوروی نا عمل ہم پین تیز و بھرم تروک مریک‘ دا خیال آتا درشانی ءِ او محکمہ مواصلات و تعمیرات نا ڈیزائن ونگ انا کنڈ آن تروک بریفنگ نا وخت آ کرے‘ داوخت آ سیکرٹری مواصلات و تعمیرات بابر خان، چیف انجینئر ڈیزائن ونگ جمال احمد بگٹی، چیف انجینئر فیڈرل پروجیکٹس ڈاکٹر سجاد بلوچ و ایلو تعلقدار کمامدار آک ہم ساڑی ئسر‘ بریفنگ ترسا سیکرٹری مواصلات و تعمیرات بابر خان ڈیزائن ونگ انا ساڑی کارکڑد، تکنیکی کارندہ غاتا کچ‘ پوسکنوڑ مشینری نا دوئی کننگ و ایلو انتظامی باندات آتتون تعلقدار جم معلومداری تس‘ او پارے کہ ڈیزائن ونگ ءِ پوسکنوڑ خواست آتتون ہمگرنچ کننگ کن پین پوسکنوڑ ازباب و ہیلکار تکنیکی کارندہ نا گرج ءِ‘ دا رد اٹ ایڈہاک بنداو آ تکنیکی کارندہ غاتا بھرتی نا عمل بنا کننگانے، ہرانا پورو مننگ آن پد ڈیزائن ونگ انا کاریمی لائخی ٹی نمان ودکی مریک و ڈٹ بندی و ڈیزائننگ نا عمل اٹی پین گچینی بریک‘ صوبائی وزیر میر سلیم احمد کھوسہ پارے کہ حکومت محکمہ مواصلات و تعمیرات نا ڈیزائن ونگ انا لائخی ءِ ودفنگ کن کل گمانی گام گیج کیک و درکار مشینری، پوسکنوڑ ازباب و ہیومن ریسورس انا فراوانی ءِِ پک کننگک‘ او پارے کہ تکنیکی کارندہ غاتا کچ ءِ ودفنگ و پوسکنوڑ آسراتی تا دوئی مننگ آن ڈیزائن ونگ پین ترند‘ آب اٹ و بھرم تروک وڑ اٹ خذمت سر تننگ کیک‘ او مستی پارے کہ ڈیزائن ونگ انا سوگوی آن محکمہ نا پرائیویٹ کنسلٹنسی ادارہ غاتیا سیبو کم مریک‘ ہرانا سوب آن سرکاری وسیلہ غآاتا بچت و ریونیو ٹی ودکی مننگ کیک‘ او دا ارادگی نا درشانی ءِ کرے کہ محکمہ مواصلات و تعمیرات ءِ پوسکنوڑ خواست آتا وڑ اٹ فعال و تینے آ سیبو کروک ادارہ اس جوڑ کننگ کن کل ساڑی وسیلہ غاتے کاریم اٹ اتنگک۔