جناح پیپلز ٹرین کوئٹہ نا الس کن صوبائی حکومت نا اسہ بھلو ٹھیکی اسے،میر محمد صادق عمرانی

کوئٹہ، بلوچستان نا سینئر صوبائی وزیر، پاکستان پیپلز پارٹی نا بنجائی کمیٹی نا باسک‘ پارلیمانی لیڈر و صوبائی وزیرِ آبپاشی میر محمد صادق عمرانی بلوچستان نا اولیکو ماس ٹرانزٹ ٹرین جناح پیپلز ٹرین ءِ صوبائی حکومت نا کنڈ آن کوئٹہ نا الس کن اسہ بھلو ٹھیکی اس گوندسا پارینے کہ ماس ٹرانزٹ ٹرین نا بنا وزیراعلیٰ بلوچستان میر سرفراز بگٹی نا کماشی ٹی الس ءِ پوسکنوڑ‘ رکھوک، آرام دہ و کم خڑچ سفری آسراتی نا فراوانی نا کنڈ آ اسہ اہم ءُ پیشرفت اسے۔ میر محمد صادق عمرانی پارے کہ جناح پیپلز ٹرین کن 32 کلومیٹر ریلوے ٹریک نا اپ گریڈیشن نا ڈٹ بیرہ 120 دے اٹی پورو کننگانے، ہراکہ صوبائی حکومت نا دروری کارکڑد و الس دوستی نا پیدوار ءُ شاہدی اسے۔ او مستی پارے کہ جناح پیپلز ٹرین نا روٹ اٹی کچلاک آن سریاب اسکان 7 اسٹیشن اوار ءُ، ہراکہ کوئٹہ و ایب کیب انا شاری تیکن سفری آسراتی تا گچین وڑ مریرہ‘ او پارے کہ طالب علم‘ ملازم، کاروباری بندغ و لس شاری تیکن دا ڈٹ ہڑدے ئی سفر ءِ پین آسان کننگ، وخت و سفری خڑچ آتیٹی کمتی اتنگ نا کنڈ آ اسہ اہم ءُ گام اسے‘حکومت بلوچستان وزیراعلیٰ نا وژن نا رد اٹ السی آسراتی تا وخت آ پوروی و گچین سفری نظام کن عملی گام گیج کننگ اٹی ءِ‘ ہراڑان صوبہ نا الس نا پت تینا گچین کروک نمائندہ غاتیا پین ودنگ اٹی ءِ۔