بلوچستان اٹ غذائی تنکی اسہ بھلو ویل اسے،میر سرفرازبگٹی

کوئٹہ، وزیراعلیٰ بلوچستان میر سرفراز بگٹی تون ورلڈ فوڈ پروگرام پاکستان نا کنٹری ڈائریکٹر انیتا ہرش اوڑدہی کرے، ہراٹی بلوچستان اٹ غذائی کاختی نا چٹفنگ، غذائی رکھ، غذائیت نا گچینی و ورلڈ فوڈ پروگرام نا رداٹ برجاڈٹ آتے ٹی ودکی تون اوار تین پہ تینی کمکاری ءِ پین ودفنگ نا امور آ سرجمی اٹ گپ و تران کننگا۔ چارشنبے نادے آ اوڑدہی ٹی بلوچستان اٹ ورلڈ فوڈ پروگرام نا رداٹ جاری ڈٹ، صوبہ ٹی غذائی حالیت و آخبت نا گام گیج آتا جاچ ءِ ہلنگا۔ دا وخت آ غذائی کاختی تون مون تننگ، چناو زالبول آتے آب اٹ غذائیت تننگ و غذائی رکھ اکن اسیجائی گام گیج آتے پین گچین جوڑ کننگ آ ہم گپ و تران مس۔ وزیراعلیٰ میر سرفراز بگٹی پارے کہ بلوچستان اٹ غذائی کاختی اسہ بھلو ویل اسے، ہرا نا چٹفنگ کن حکومت، جہانی ادارہ غاک و تعلقدار شریدار آتا نیام اٹ مربوط و اسیجائی اٹ گام گیج المی ءِ۔ او پارے کہ حکومتِ بلوچستان غذائی کاختی نا چٹفنگ و غذائی رکھ ءِ گچین جوڑ کننگ کن گچین گام گیج کننگ ءِ و دا بابت جہانی ادارہ غاتا کمک ءِ اہمیت ایتک۔ وزیرِ اعلیٰ پارے کہ چناو زالبول آتے جوان و آب اٹ غذائیت تننگ جان جوڑ و توانا راج انا جوڑ کننگ کن بنداوی اہمیت تخک۔ غذائی کاختی نا براہِ راست تعلق انسانی جان جوڑی، چناتانشوونما و جم انسانی شونداری تون ءِ، ہندا سوب آن دا ویل انا ایسری کن مریس مدّی و پائیدار گام گیج المی ءِ۔ میر سرفراز بگٹی پارے کہ حکومتِ بلوچستان و ورلڈ فوڈ پروگرام نا اسیجائی اٹ گام گیج آک صوبہ ٹی غذائی کاختی نا چٹفنگ و غذائی رکھ انا مون آ دننگ کن نتیجہ خیز جوڑ مریرہ۔ او ورلڈ فوڈ پروگرام نا برجاڈٹ آتے کن صوبائی حکومت نا کنڈ آن ہر وڑ نا کمک نا باور ی کرفسا پارے کہ صوبائی حکومت تین پہ تینی کمک نا دنگ ءِ پین ودفنگ کن تیار ءِ۔ وزیراعلیٰ پارے کہ حکومتِ بلوچستان غذائی رکھ و انسانی شونداری نا بشخ آتیٹی جہانی ادارہ غاتون کمک ءِ پین گچین جوڑ کیک تانکہ صوبہ نا الس خاص کر چنا و زالبول آتے گچین غذائی آسراتی تننگ مرے۔ اوڑدہی ٹی ورلڈ فوڈ پروگرام نا کنڈ آن بلوچستان اٹ برجاگام گیج و آخبت نا پروگرام آتا بابت ہم سرجمی اٹ گپ و تران کننگا۔