پاکستان و چین نا تعلقداریک ننا خارجہ پالیسی نا بنداوی تمبہءُ،وزیراعظم شہبازشریف

اسلام آباد، وزیراعظم محمد شہباز شریف پارینے کہ پاکستان و چین نا نیام اٹی متکن و آزمودہ غاتیا تالان سنگتی ہڑتوم آ ملک آتا الس کن شونہال و شون ہلوک آخبت نا اسیجائی استخوانی تا ڈیک ءِ‘ پاکستان و چین تینا سفارتی تعلقداری تا 75 می دے ءِ اڈ تننگ اٹی ءُ و ہڑتوم آ ملک اتا نیام اٹی تعلقداریک وخت انا ہر امتحان اٹی پین سوگو مسنو۔ دا خیال آتا درشانی ءِ او اسلام آباد اٹی عوامی جمہوریہ چین نا جوڑ مننگ نا 77 می سال دے نا وخت آ اڈہلوک دود آن تران کرسا کرے۔ وزیراعظم چینی قومی دے انا دود اٹی بشخ ہلنگ ءِ تینکن خوشی نا سوب گوندسا چین نا صدر شی جن پنگ و چینی الس ءِ است نا ہُب اٹ مبارکبادی تس‘ اوپارے کہ چین نا قومی دے عظیم چینی قوم انا سوگو سلنگ‘ سیوت و پنپروک جوزہ ءِ خراجِ تحسین پیش کننگ نا دے ءِ‘ شہباز شریف پارے کہ جہانی امن، سوگوی و شونداری ٹی چین نا بھاز اہم ءُ کڑد اسے۔ صدر شی جن پنگ نا مُر ہروک سرکڑدہ ہی نا ذکر ءِ کرسا او پارے کہ چین انسانی شونداری، سائنس، ٹیکنالوجی و پوسکنوڑ بشخ آتیٹی نمان پیشرفت کرینے‘ 2026ء پاکستان و چین نا اسیجائی سفر اٹی خاص اہمیت تخک انتئے کہ ہڑتوم آ ملک آک تینا سفارتی تعلقداری تا 75 می سال دے ءِ اڈ تننگ اٹی ءُ۔ او پارے کہ پاکستان و چین نا الس نا است اسہ ایلو تون گنڈوک ءُ و ہڑتوم آ ملک آتا سنگتی زمی جمب‘ طوفان و نوکاپ تون اوار کیہی آزمائشت آتتون مون تسنے‘ چین پاکستان اقتصادی راہداری (سی پیک) نا ذکر ءِ کرسا وزیراعظم پارے کہ دا ڈٹ پاکستان و چین نا متکن آ سنگتی و ہڑتوم آ ملک آتا الس کن پین شونہال و شون ہلوک آخبت نا اسیجائی ارادگی نا درشانی ءِ او پڑو کرے کہ پاکستان و چین داسہ سی پیک نا بروک آ ریسہ سی پیک 2.0 اٹی ہننگ اٹی ءُ، دا پوسکن آ ریسہ ٹی صنعت کاری، خصوصی اقتصادی زون، انفارمیشن ٹیکنالوجی و آرٹیفیشل انٹیلیجنس، کشت و کشار، کان کنی و معدنیات نا بشخ آتیا خاص چکار کننگک‘ وزیراعظم کشت و کشار نا بشخ اٹی پاکستان و چین نا ودوک آ کمکاری ءِ ستاکڑزوک گوندسا پارے کہ پاکستان تون تعلقدار اسہ ہزار کشاری گریجویٹس نا اولیکو گروپ چین اٹی تینا ہیلکاری ءِ پورو کرینے، وخت اس کہ پین ہزار بندغ آ تالان بروک آ گروپ چین آ ہننگ کن تیار ءِ‘ او پارے کہ ورناتے پوسکنوڑ ہیلکاری و چاہنداری تیان شپ کننگ اوفتا لائخی و آخبت اٹی اسہ نہادیءُ زرکاری اسے‘ شہباز شریف پارے کہ پاکستان و چین نا تعلقداریک پاکستان نا خارجہ پالیسی نا بنداوی تمبہ ءُ‘ او برجا مئی ٹی چینی صدر شی جن پنگ تون مروک گپ وتران نا حوالہ ءِ ترسا اودے ہڑتوم آ ملک آتا متکن آ دوستی نا سوگو قول انا دوارگی گوندا۔ وزیراعظم پارے کہ پاکستان و چین نا سرکڑدہ غاتا نیام اٹ پک مروک اہم مفاہمت آ عملدرآمد کن پاکستان پورو وڑ اٹ سنبرینگوک ءِ۔