زالبول آتے ہنرمند و زرگزرانی واکدار کننگ کن عملی گام گیج کننگ انگ ءِ،انجینئر عائشہ زہری

قلات، ڈپٹی کمشنر قلات انجینئر عائشہ زہری پارینے کہ حکومت زالبول آتا آسودہی‘ اوفتے ہنرمند و زرگزرانی وڑ اٹ واکدار جوڑ کننگ کن عملی گام گیج کننگ اٹی ءِ زالبول آتے پوسکنوڑ فنی و کسبی ہیلکاری ہیلکاری نا فراوانی آن اوفتے شرفیروزگار نا وارخواہیک رسینگ کیرہ و او تینا خاہوت و راج انا جوڑ کننگ و شون تننگ اٹ بھرمی کڑد ادا کننگ کیرہ۔ دا ہیت آتے او بیت المال نا بست وبندی دستکاری سینٹر نا دورہ وخت آ نا انسٹرکٹر و ہیل کروک مسڑ طالب علم آتتون ہیت وگپ کرسا کرے۔ ڈپٹی کمشنر پارے کہ ضلعی انتظامیہ زالبول آتا تعلیم، فنی ہیلکاری و آسودہی کن کاریم کروک ادارہ غاتتون ہر وڑ انا کمکاری ءِ برجا تخک۔ ماسٹر ٹرینر فیشن ڈیزائننگ سلیمہ افضل و ایلو کارندہ غاک ڈپٹی کمشنر ءِ سینٹر اٹی برجا فیشن ڈیزائننگ، بیوٹیشن، کمپیوٹر بیسک، کارپٹنگ، دستکاری، تدریسِ قرآن و ایلو ہیلکاری کورس‘ مسڑ طالب علم آتے فراوان کروک آسراتی، وظیفہ و مون تروک ویل آتا بابت جم بریفنگ تسر۔ ڈپٹی کمشنر مسڑ طالب علم آتیا زور شاغا کہ او دوئی کروک ہنر ءِ عملی زند اٹی کاریم اٹ اتسا تینا لائخی تے پین گچن کیر و تینے آ سیبو کننگ نا کنڈآ کار۔ ڈپٹی کمشنر انجینئر عائشہ زہری فیشن ڈیزائننگ، بیوٹیشن، کمپیوٹر، کارپٹنگ، دستکاری و ایلو کورس آتے پورو کروک و نمان پوزیشن دوئی کروک طالب علم مسن تے سرٹیفکیٹ تس‘ ڈپٹی کمشنر انجینئر عائشہ زہری نا دستکاری سینٹر بننگ آ کوآرڈینیٹر بیت المال سی ای او گیاوان ڈسٹینیشن بلوچستان شازیہ اکبر زہری، ہیڈ مسٹریس پروین نذر کھیتران و ماسٹر ٹرینر آک اونا منتواری ءِ ہرفیر۔