خراج تروک انڈسٹری تا ویل آتے اولیتی بنداو تیا ایسر کننگک،سائرہ عطاء

حب، کمشنر لسبیلہ ڈویژن سائرہ عطاء پارینے کہ زرگزرانی ردوم صنعتی شون ہلنگ آن بریک، ضلع حب بلوچستان نا زرگزرانی شونداری نا گیٹ وے و کل آن بھلا صنعتی ہند مسنے‘ 150 بلین نا زرکاری اٹ جوڑ مروک حب صنعتی زون نا ویل آتے صنعتکار تا سلاہ اٹ ایسر کننگک۔ دا ہیت آتے او چیمبر آف کامرس، لیڈا و اسٹیک ہولڈرز نا کوآرڈینیشن دیوان آن تران کرسا کرے۔ کمشنر پارے کہ بنگلہ دیش صنعتی شونداری نا چکار کرے اینو او ننے آن مونی پیش تمانے۔ کمشنر پارے کہ تکنیکی راہشونی فراوان کروک انجینئر آتیکن این او سی نا جاری کننگ نا وڑ وڈول و پالیسی سازی کن چیف سیکرٹری نا نوٹس اٹی اتنگک۔ کمشنر پارے کہ بلوچستان آن ایف بی آر ءِ خراج تروک صنعتکار آتا 300 صنعتی یونٹ آتیٹی 29 ٹیکس ریٹرن کلیکشن بلوچستان ریونیو اتھارٹی اٹی رجسٹرڈ ءُ، بلوچستان نا ٹیکس ریٹرن نا شیئر سندھ و پنجاب نا شیئر اٹی کاہک‘ دا باندات ءِ ہم ایف بی آر و بلوچستان ریونیو اتھارٹی نا کوآرڈینیشن اٹ ایسر کننگک۔ کمشنر لسبیلہ پارے کہ ضلع حب اٹی 300 صنعتی یونٹ ءُ، لیڈا انڈسٹریل زون نا 163 اٹی 70 انڈسٹریز آپریشنل و ایلو نان فنکشنل مسنو، لیڈا آفیشل آک ننے دا سوب و ویل آتا نشاندہی ءِ کیر، انڈسٹری تے بند منگ کن الیپنہ۔ ننے تینا مائنڈ سیٹ ءِ بدل کروئی و مونی ہنوئی تمک۔ کمشنر لیڈا افسر آتے پارے کہ کمپنی تا ٹیکس ایشو و پروڈکشن نا نشاندہی تون اوار انڈسٹری تے ٹی کاریم کروک مزورکار آتا ویجز، جاب ڈیٹا کلیکشن، لیبر تا ہیلتھ اینڈ سیفٹی و اینوائرنمنٹ ایس او پی تیا ہم عملدرآمد کیر، ٹیکس تروک انڈسٹری تا ویل آتے اولیتی بنداو آ ایسری کن انتظامیہ راہشونی و ہر وڑ انا کمک فراوان کیک انتئے کہ انڈسٹری تتون ہزار آ مزور کار آتا روزگار گنڈوک ءِ۔