کشاری مصنوعات آتے کن جہانی مارکیٹ آتیٹی رسینگ ءِ ودفنگ کن گام گیج کننگے،وزیراعظم شہباز شریف

اسلام آباد، وزیراعظم شہباز شریف فی ایکڑ کشاری پیداوار اٹ ودکی، کشت وکشار اٹی پوسکنوڑ اتنگ، لائیو اسٹاک نا بشخ انا شونداری و کشاری برآمد آتے ودفنگ کن بنجاو صوبہ غاتا نیام اٹ گچین رابطہ و شریداری نا گرج آ زور شاغسا پارینے کہ پاکستان نا کشاری مصنوعات آتے کن جہانی مارکیٹ آتیٹی رسینگ ءِ ودفنگ و پوسکن ءُ مارکیٹ پٹنگ کن مربوط گام گیج کننگے۔ وزیراعظم آفس نا پریس ونگ آن جاری بیان نا رداٹ وزیراعظم محمد شہباز شریف نا کماشی ٹی کشاری بشخ و کشاری برآمد آتا مونی دننگ نابابت بڑزکو کہولی دیوان اس اڈ ہلک۔ دیوان آن تران کرسا وزیراعظم پارے کہ کشاری بشخ اناپاکستان نا زرگزران نا شونداری و مدامگی ٹی اہم کڑد اسے، فی ایکڑ کشاری پیداوار اٹ ودکی، کشت وکشار بشخ اٹی پوسکنوڑی اتنگ، لائیو اسٹاک نا بشخ انا شونداری و کشاری برآمد آتا مونی دننگ کن بنجائی و صوبہ غاتا نیام اٹ گچین رابطہ و شریداری المی ءِ۔ وزیراعظم کشاری برآمد آتا مونی دننگ کن پاکستان نا پیشن نا ملک مشن آتیٹی تعینات کمرشل آفیسر آتے گچین کڑد ادا کننگ نا پارت کرے۔ وزیراعظم بزغرآتے فصل آتا چاروکی کن دوئی موبائل ایپ نا بابت معلومداری ودفنگ کن گچین میڈیا مہم چلیفنگ نا ہم پارت کرے۔ او پارے کہ کشاری بشخ انا برآمد آتا ودفنگ کن کشاری مصنوعات اٹی ویلیو ایڈیشن المی ءِ۔ دیوان اٹی کشاری بشخ انا مون آ دننگ و کشاری برآمد آتے ودفنگ کن سلاہ پیش کننگا۔ دیوان اٹی حوال اٹی پاننگا کہ تدوک آ مالی سال اٹی پاکستان نا کشاری بشخ آن برآمد آک 5.18 ارب ڈالر ئسر۔ برنج، فشریز، حلال سُو، پٹاٹہ، کُنچد، تمباک، امب و مکئی پاکستان نا نمان کشاری برآمد آک ئسر۔ دیوان اٹی کشاری برآمد آتیٹی ودکی کن ویلیو چینز جوڑ کننگ نا سلاہ تننگا و پاننگا کہ چین، سعودی عرب، ایران و خلیجی ملک آک پاکستان نا کشاری برآمد آتا بابت اہم ملک آک ءُ۔ نیشنل ایگریکلچر اینڈ فوڈ سکیورٹی کونسل ءِ فعال کننگک۔ دیوان اٹی پاننگا کہ نیشنل ایگریکلچر اینڈ فوڈ سیکورٹی کونسل اٹی وزیراعلاک تینا تینا صوبہ غاتا نمائندگی ءِ کیرہ۔ دیوان اٹی ڈیجیٹل فارمرز ڈائری-ایگری اسٹیک جوڑ کننگ نا سلاہ ہم تننگا ہرانا رداٹ مچ آ ملک انا بزغرو کشاری لینڈ ریکارڈ آتے ڈیجیٹائز کننگک۔ ڈیجیٹل فارمرز ڈائری-ایگری سٹیک نا رداٹ ڈغارو دیر انا جاچ انا ریکارڈ آتے ڈیجیٹائز کننگک، گچین بھرم تروک کشاری وڑوڈول آتا مون آ دننگ کن پاک-گیپ (Pakistan-Good Agriculture Practices) نظام اس جوڑ کننگک۔ حوال اٹی مستی پاننگا کہ کشاری بشخ انا برآمد کروک آتا مونی دننگ کن کشاری فنانسنگ نا بابت آسراتی فراوان کننگک۔ دیوان اٹی بنجائی وزیر ڈٹ بندی احسن اقبال، بنجائی وزیر قومی غذائی رکھ رانا تنویر حسین، بنجائی وزیر اقتصادی باندات احد خان چیمہ، بنجائی وزیر موسمیاتی بدلی مصدق ملک، بنجائی وزیر واپارجام کمال خان، بنجائی وزیر حوالکاری و شینکاری عطاء اللہ تارڑ، بنجائی وزیر انفارمیشن ٹیکنالوجی و ٹیلی کام شزا فاطمہ، سلاہکارصنعت و پیداوار ہارون اختر، وزیر مملکت خزانہ و ریلوائی بلال اظہر کیانی، وزیر مملکت قومی غذائی رکھ ملک رشید احمد و تعلقدار بڑزکو سرکاری افسر آک بشخ ہلکر۔