GBPS سرآپ راغے ٹی تعلیمی پروگرام اس اڈ تننگا

ضلع واشک نا تحصیل ناگ انا ہند سرآپ راغے ٹی گورنمنٹ بوائز پرائمری اسکول (GBPS) سرآپ راغے نا کنڈ آن اسہ شرفدار ءُ تعلیمی پروگرام اس اڈ ہلک، ہراٹی علاقہ نا متبر آک، مار مسڑ طالب علم آک، لمہ باوہ و ایلو بندغ آک بھلو کچ اسے ٹی بشخ ہلکر۔ دود انا باقاعدہ بنا تلاوتِ قرآنِ پاک آن مس ہرانا بختاوری ءِ حافظ محمد عرفان دوئی کرے۔ تلاوتِ کلامِ پاک آن پد آصف رحیم و اسہ مسڑ طالب علم اس تینا ہنین آ توار اٹی نعتِ رسولِ مقبول ﷺ پیش کریر۔ اونا رند اٹ کلاس پنجم نا طالب علم فراز ثناء انگریزی زبان اٹی جم جوش اٹ تران اس کرے، وخت اس کہ کلاس سوم نا اِرا طالب علم ظہیر احمد و اعزاز نیاز انگریزی ٹی اسہ دلچسپ ءُ مکالمہ (Conversation) اس پیش کریر۔ اوکان پد بی بی سارہ اردو زبان اٹی تران کرے و ساڑی آ بندغ آتیان شاباشی ہلک۔ غلام جان براہوئی زبان اٹی تران پیش کرسا تعلیمی پروگرام ءِ پین رنگدار جوڑ کرے۔ ناگ (نامہ نگار)