پرائیویٹائزیشن نا مونی کن حکومت پبی کمکاری ءِ برجا تخک،سینیٹر محمد اورنگزیب

اسلام آباد، بنجائی وزیر خزانہ و بنگ سینیٹر محمد اورنگزیب پارینے کہ پرائیویٹائزیشن و پبلک پرائیویٹ پارٹنرشپ ءِ مونی دننگ کن حکومت پبی کمکاری ءِ برجا تخک، کوشست ءِ کہ زرگزران ءِ شیفی بڑزی نا چکر آن کشنگے۔ جی ڈی پی نا کچ اٹ خراج آتا کچ 8.8 درسد آن ودسا 10.3 درسد مسنے۔ جمعہ نادے ایشیائی شونداری بینک انا کنڈ آن ”پبلک پرائیویٹ پارٹنرشپ و پرائیویٹائزیشن“ نا بابت قومی اسٹرٹیجک مکالمہ غان تران کرسا وزیر خزانہ پارے کہ ننا اولیت آجو زرگزران نا سوگوی نا چاگڑد ءِ آخبتی بنداو تیا برجا تخنگ ءِ، دا سوگوی بھاز خواری اٹ دوئی مسنے و بھاز مشکل فیصلہ کننگانے ولے ننے دا ہیت ءِ پک کروئی مریک کہ نن دُوارہ بوم اینڈ بسٹ نا چکر تیٹی پدی ہنپن۔ ارٹمیکو اولیت سوگوی آن مدامگی زرگزرانی نمو نا کنڈ آ ہننگ، مسٹمیکو اولیت پنجری اصلاحات نا بابت ساڑی کسر تیا پبی استقامت اٹ سلنگ چارمیکو اولیت دا دے کہ پرائیویٹ بشخ ءِ ملک انا زرگزران نا کماشی ءِ برجا تخنگ نا قابل جوڑ کننگے، ہندا ہمو جاگہ ءِ ہراڑے پرائیویٹائزیشن نا عمل اہمیت تینائی کیک۔ وزیر خزانہ پارے کہ تدوک آ دونیم آن مسہ سال اٹی نن اِرا بنداوی نسخان آتتون مون تننگ اٹ بھلو فاصلہ اس پک کرینن، منہ سال مست دا نسخان جی ڈی پی نا 12.5 درسد نا بڑزکو کہول آن کم مرسا 2.6 درسد مسنے‘ دا کمتی ٹی ریونیو ٹی ودکی و ایلو کنڈ آخڑچ آتیٹی کمتی کڑد ادا کرینے، ایف بی آر اٹی اصلاحات نا بابت نن ہیومن ریسورس، وڑوڈول و ٹیکنالوجی نا بشخ آتیٹی ہرا گام گیج آتے کرین اوفتے ٹی تدوک آ اِرا سال اٹی ننا ریونیو ہلنگ اٹ 40 درسد ودکی مسنے، دا وخت آ سول حکومت ءِ چلیفنگ نا خڑچ، وام تا پدی تننگ نا خڑچ پین پین تون اوار جم خڑچ آتے کم کننگ نا رد وریسہ ءِ ہم برجا تخنگانے، ایف بی آر نا خراج ٹو جی ڈی پی کچ ہرا اسہ وخت اسے آن بیرہ 8.8 درسد آ شیفی نا گواچی ئس ہرا داسہ ودسا10.3 درسد مسنے۔ ننے دادے پین ودفسا گونڈ مد اٹی 11 آن 12 درسد اسکان دروئی مریک تانکہ نن ڈیہہ انا ملک آتا کہول اسکان سر مننگ کین۔ وزیر خزانہ پارے کہ تدوک آ مالی سال اٹی زرراہی تس آتا سوگوی تون اوار اوار آئی ٹی برآمدی خذمت آتیٹی حقی ردوم ہم کمک تس۔ تدوک آ سال آئی ٹی برآمدی خذمت آتا کچ 4.6 ارب ڈالر ئس، ہرافتے آن 1.6 ارب ڈالر ءِ فری لانسرز فراوان کرے۔