ایم پی اے میر حاجی زابد علی ریکی نا کماشی ٹی ماشکیل اٹی شجرکاری مہم

چاگڑدی گڑد انا چٹفنگ، ودوک آ باسنی نا ترندی ٹی کمتی اتنگ و مچ آ علاقہ ءِ سرسوز کننگ کن ماشکیل اٹی شجرکاری مہم نا رد اٹ گورنمنٹ بوائز ہائر سیکنڈری اسکول لدگشت اٹی سول انتظامیہ ماشکیل نا کمک اٹ دود اس اڈ ہلک۔ دا دود انا خاص انگا مہمان ایم پی اے و خادمِ واشک میر حاجی زابد علی ریکی ئس۔ دود اٹ اسکول نا ہیڈ ماسٹر عطاء اللہ حسنی، جنرل کونسلر میر حاجی محمد اسحاق ملنگزئی، میر حاجی عبدالقدوس گنگوزئی، ممبر ڈسٹرکٹ کونسل واشک میر محمد ہاشم ریکی، صدر انجمن تاجران ماشکیل و جنرل کونسلر میر کبیر احمد ریکی، یو سی لدگشت نا وائس چیئرمین میر عکاشہ ملازئی، ڈاکٹر محمد رفیق سیاہ پاد، میر وسیم ریکی، سمیع اللہ ریگی، مولوی نعیم، میر حاجی محمد ایوب ملازئی، جنرل کونسلر میر حاجی غوث بخش سہر، میر اشفاق ریکی، مولوی عبداللہ، میر حاجی نہال خان کشانی، استاد‘ سیاسی، راجی وقبائلی متبر‘ عالم دین و طالب علم آک بھلو کچ اسے ٹی بشخ ہلکر۔ دا وخت آ تران کرسا ایم پی اے میر حاجی زابد علی ریکی پارے کہ شجرکاری نئے بیرہ چاگڑدی گڑد انا چٹفنگ کن اسٹ انگا کسر ءِ بلکہ داڑان باسنی نا ترندی ہم کم مریک و ننے کل ءِ اسیجا مرسا علاقہ نا جوانی و شجرکاری مہم ءِ سرسہب کننگ کن تینا کڑد ءِ ادا کروئی تمک۔ ماشکیل (نصیر کبدانی/ نامہ نگار)