صوبائی حکومت السی ویل آتا ایسری کن عملی گام گیج کننگ ءِ،وزیراعلیٰ بلوچستان

کوئٹہ، وزیراعلیٰ بلوچستان میر سرفراز بگٹی پارینے کہ صوبائی حکومت السی ویل آتا ایسری و صوبہ نا مدامگی شونداری کن عملی گام گیج کننگ ءِ۔ دا خیال آتا درشانی ءِ او صوبائی وزیر جان جوڑی بخت محمد کاکڑ، بلوچستان اسمبلی نا باسک زمرک خان اچکزئی، وائس چانسلر میر چاکر خان رند یونیورسٹی سبی ڈاکٹر ممتاز علی بلوچ، علی جان بگٹی، قبائلی راہشون میر شفقت مری، مقبول مری، مسکوہی ڈپٹی کمشنر ڈیرہ بگٹی اظہر شہزاد، ایڈووکیٹ منیر کاکڑ، نجیب کاکڑ، و ملک غفار خان ناصر تون اوڑدہی تا وخت آ کرے۔ اوڑدہی تیٹی صوبہ نا جم حالیت، السی ویل، شونداری باندات‘ انتظامی باندات، بڑزکو تعلیم و تین پہ تینی استخواہی نا چندی باندات آتیاگپ و تران کننگا۔ دا وخت آ وزیراعلیٰ بلوچستان پارے کہ حکومت نا اولیت الس ءِ بنداوی آسراتی تا فراوانی، شونداری ڈٹ آتا وخت آ پورو کننگ و گورننس نا نظام ءِ پین گچین جوڑ کننگ ءِ۔ او پارے کہ السی نمائندہ، قبائلی سرکڑدہ، تعلیم نا چاہندارو راج انا جتا جتا تپہ غاتا سلاہ تے اہمیت تننگک۔ بلوچستان نا شونداری و شونہالی کن کل اسٹیک ہولڈر آتتون اواری اٹ کاریم کننگ اُن و السی ویل آتا ایسر اٹ ہچ ءُ ڈیوالئی اسے سگنگ مفک۔ او پارے کہ حکومت بلوچستان اٹ تعلیم، جان جوڑی، روزگار، امن و ایمنی و بنداوی پنجرنا بشخ آتیٹی گچینی کن گچین گام گیج کننگ ءِ۔ صوبہ نا مرانگا علاقہ غاتے شونداری نا دنگ اٹی اوار کننگ حکومت نا پالیسی نا اہم بشخ ءِ۔ وزیراعلیٰ پارے کہ اجتماعی سلاہ و تین پہ تینی کمک اٹ بلوچستان ءِ شونداری، شونہالی و سوگوی نا کسر آ دننگ مریک۔