اسلام آباد ایم اویو نا رد اٹ پک مروک مفاہمت ءِ مونی دننگ بھاز اہم ءِ،وزیراعظم نا ایرانی صدر تون اوڑدہی

بشکیک، وزیراعظم شہباز شریف و ایرانی صدر مسعود پزشکیان نا نیام اٹی شنگھائی کمکار تنظیم نا سروک دیوان نا وخت آ اوڑدہی مس‘ ہراٹی پاک ایران تین پہ تینی تعلقداری و جتا جتا بشخ آتیٹی کمکاری نا ساڑی حالیت نا پورو جاچ ہلنگا۔ وزیراعظم شہباز شریف اسلام آباد ایم او یو نا رِداٹ پک مروک مفاہمت ءِ مونی دننگ نا گرج آ زور شاغا و پارے کہ ڈیہہ اٹی مریس مدی امن کن دا اسٹ انگا کاریم اٹ بروک آ کسر ءِ۔ اوڑدہی ٹی ہڑتوم آ سرکڑدہ غاک تین پہ تینی تعلقداری تے پین شون تننگ و سوگو کننگ نا عزم انا درشانی ءِ کریر، وخت اس کہ چندی بشخ آتیٹی کمکاری ءِ ودفنگ کن ساڑی وارخواہی غاتیان فائدہ ہرفنگ نا گرج آ زور شاغنگا۔بشکیک اٹی شنگھائی کمکار تنظیم نا سروک دیوان ناوخت آ وزیراعظم محمد شہباز شریف و ایرانی صدر ڈاکٹر مسعود پزشکیان نا اوڑدہی مس۔ وزیراعظم محمد شہباز شریف کرغزستان نا دارالحکومت بشکیک اٹی شنگھائی کمکار تنظیم نا سروک دیوان نا وخت آ آ اسلامی جمہوریہ ایران نا صدر ڈاکٹر مسعود پزشکیان تون اوڑدہی کرے‘ جم وجوش و ایلمی چاگڑد اٹی مروک آ دا اوڑدہی نا وخت آ ہڑتوم آ سرکڑدہ غاک پاکستان و ایران نا نیام اٹی خڑکی و تاریخی تعلقداری تے ودفنگ نا دوارگی کریر و تین پہ تینی کمکاری نا کل بشخ آتے ٹی تعلقداری تے پین سوگو کننگ نا اہمیت آ ہیت کریر۔ ہڑتوم آ سرکڑدہ غاک دا بابت برجا سال جون اٹی صدر پزشکیان نا دورہِ پاکستان نا وخت آ کروک اہم فیصلہ غاتیا عملدرآمد نا اہمیت آ ہم زور شاغار۔ ہڑتوم آ سرکڑدہ غاک علاقائی حوال نا شون تننگ و السی کہول آ حوال آتے پین ودفنگ کن برجا کوشست آتا ہم جاچ ءِ ہلکر۔ اوڑدہی نا وخت آ علاقائی حالیت اٹی مروک پوسکن آ پیشرفت آ ہم جم گپ وتران کننگا۔ وزیراعظم دا عزم انا دوارگی کرے کہ پاکستان ڈیہہ اٹی امن کن تینا سخت اٹ کروک کوشست آتے برجا تخک۔ او پارے کہ فیلڈ مارشل سید عاصم منیر نا داسہ نا دورہ تہران و اونا کاریمی رابطہ غاتیان جوان بھرم تا اومیت ارے۔ وزیراعظم ڈیہہ اٹی مدامگی امن و سوگوی نا دوئی کننگ کن تحمل، ضبط و سگ و پدریسہ سفارتی حوال آتا اہمیت آ زور شاغا۔ او اسلام آباد مفاہمتی یادداشت نا رِداٹ پک مروک مفاہمت ءِ مونی دننگ نا گرج آ زور شاغا و پارے کہ ڈیہہ اٹی مریس مدی امن کن دا اسٹ انگا قابلِ عمل کسر ءِ۔ ایرانی صدر ڈاکٹر مسعود پزشکیان علاقائی امن و سلامتی کن پاکستان نا سفارتی کوشست آتا ستاءِ کرے و خراجِ تحسین پیش کرے، ایرانی صدر پاکستان و ایران نا تعلقداری تا مدامگی سوگوی آ ہیت کرسا پارے کہ ہڑتوم آ ملک آتا تعلقداریک کرن آتیا تالان اسیجائی تاریخ، دود ربیدہ و مذہب نا سوگو آ بنداو تیا تفوک ءِ۔ او چندی بشخ آتیٹی کمکاری ءِ پین ودفنگ کن تہران نا استخواہی تا درشانی ءِ کرے۔ صدر پزشکیان داسہ نا چیلنج آتتون مون تننگ کن امتِ مسلمہ نا نیام اٹی سیوت و یکجہتی ءِ شون تننگ نا اہمیت نا ذکر ءِ کرے۔ اوڑدہی نا وخت آ بنجائی حوالکاری وشینکاری عطاء اللہ تارڑ، خصوصی کمکار وزیراعظم سید طارق فاطمی و سیکرٹری خارجہ سفیر آمنہ بلوچ ساڑی ئس۔ ایرانی وزیر خارجہ عباس عراقچی و ایلو بڑزکو کمامدار آک ہم داوخت آ ساڑی ئسر۔