سرکاری و پرائیویٹ بشخ انا گچین شریداری آن زرگزران سوگو مریک،بنجائی وزیر خزانہ

اسلام آباد، بنجائی وزیر خزانہ و بنگ سینیٹر محمد اورنگزیب پارینے کہ ملک سوگوی آن ردوم نا کنڈ آ ہِننگءِ، برآمد آتیاتالان ردوم کن گام گیج آتا ردوریسہ برجاءِ، حکومت مالی گنجائشت نا رداٹ برآمد آتیا تالان ردوم ءِ مونی دننگ کن تینا کڑد ءِ ادا کننگ ءِ۔ دوشنبے نادے آ ایگزم بینک انا کنڈ آن اڈ ہلوک دود اسے ٹی خاص انگا مہمان نا وڑ اٹ تران کرسا وزیر خزانہ پارے کہ زرگزرانی شونداری ٹی پرائیویٹ بشخ انا اوار مننگ المی ءِ، سرکاری و پرائیویٹ بشخ انا سوگو شریداری آن زرگزران مدامگی بنداو تیا مونی ہِننگ کیک، زرگزرانی سرجزآتاعمل زرکاری و کاروباری سرجزآتا مونی دننگ تون گنڈوک ءِ، حکومت زرگزرانی سوگوی تون اوار مدامگی شونداری کن گام گیج کننگ ءِ۔ وزیر خزانہ پارے کہ ملک دا وخت آ سوگوی آن ردوم نا کنڈ آ ہِننگءِ، منہ سال مست ننا زرگزران کم مسوسس ولے پدریسہ بحالی نا عمل برجاءِ، تدوک آ سال زرگزرانی ردوم نا کچ 3.7 درسد ریکارڈ کننگاسس، برجاسال اونا کچ آن زیات انا اومیت ءِ۔ وزیر خزانہ پارے کہ نیامی دے ٹک نا ساڑی تنکی آن کبینی و جم قومی پیداوار آ زہم تمانے، پاکستان دا ویل انا ایسر کننگ اٹی تینا کڑد ءِ ادا کننگ ءِ۔ او پارے کہ مستین اٹ شیف و بڑزی نا سائیکل نا سوب آن زرتس تے ٹی بریبری نا ویل آک مون آ بسوسر، ننا کوشست ءِ کہ برآمد آتیا تالان ردوم و اودے مدامگی بنداو تیا برجا تخنگ آ چکار کننگے۔ دا وخت آ مالی نسخان 22 سال نا کم انگا کہول آٹےِ، پرائمری بیلنس نا حالیت ہم گچین ءِ، تدوک آسال حساب جاریہ نا کھاتہ غاک فاضل ئسر۔ وزیر خزانہ پارے کہ ننکن ردوم اف بلکن ردوم ءِ مدامگی بنداو تیامون آ دننگ اسہ چیلنج اسے، دا ڑکن پرائیویٹ بشخ انا کماشی ٹی برآمد آتیا تالان ردوم نا پالیسی آ عمل کننگ اُن۔ حکومت نا حیثیت اٹ ننا کڑد بریبر و گچین ایکو سسٹم نا فراوانی ءِ، حکومت مالی گنجائشت نا رداٹ برآمد آتیا تالان ردوم ءِ مونی دننگ کن تینا کڑد ءِ ادا کننگ ءِ، تدوک آ برجا مالی سال انا بجٹ اٹی دا بابت کیہی گام گیج کننگاسس، سپر خراج ءِ چٹفنگا، ایڈوانس خراج اٹی ہم آسانی تننگانے، توانائی نا نہاد آتے گوبر جوڑ کننگ کن گام گیج آتا ردوریسہ برجاءِ۔ وزیر خزانہ پارے کہ گوبر مالیات کن ننا کوشست آک برجاءُ، دُن تو نیامی دے ٹک نا تنکی نا سوب آن زرگزران آ زہم تماو پالیسی ریٹ اٹی ودکی مس ولے اوکان پد ہم حکومت حالیت آتے گچین کننگ کن گام گیج کننگ ءِ، برآمد کروک آتے 4.5 درسد نا کچ اٹ مالی کمک تننگ انگ ءِ، دا بابت ایگزم بینک پاکستان نا کڑد اہم ءِ‘ حکومت ایکسپورٹ ری فنانسنگ کن گام گیج کننگ ءِ، ایل ٹی ایف ایف آ عملدرآمد مسنے، ننا کوشست ءِ کہ برآمد آتا بنداو ءِ پین گیشتر بنداو و وڑپہ وڑ کننگے۔ وزیر خزانہ پارے کہ برآمد آتا مونی دننگ اٹ چنکا و نیامی درجہ نا کاروبار نا اہمیت منوک ءِ و حکومت کوشست کننگ ءِ کہ چنک آن چنکا برآمد کروک آتے سبسڈائز مالیات نا فراوانی ءِ پک کننگے۔