پاکستان کن سعودی عرب نا پدریسہ مخ تفی نا منت وار اُن، وزیرِاعظم شہباز شریف
ڈیہہ اٹی امن و سوگوی نا مون آ دننگ کن سعودی عرب نا کڑد بھاز اہم ءِ، سفارنگوک سعودی سفیر تون اوڑدہی
Get real time updates directly on you device, subscribe now.
وزیرِاعظم محمد شہباز شریف پاکستان کن سعودی عرب نا پدریسہ مخ تفی، کمک و ڈیہہ اٹی امن و سوگوی نا مونی دننگ کن کڑد انا ستاءِ کرینے۔ وزیراعظم آفس نا میڈیا ونگ انا کنڈآن پنچ شنبے نادے آ جاری بیان نا رداٹ پاکستان اٹ سعودی عرب نا سفیر نواف بن سعید المالکی تینا سفارتی زمواری تا پوروی آ وزیرِاعظم محمد شہباز شریف تون وزیرِاعظم ہاؤس اٹ سفاروکی اوڑدہی کرے۔ وزیراعظم سعودی سفیرءِ پاکستان اٹ تینا سفارتی زمواری تے سرسہبی اٹ پورو کننگ آ مبارکبادی تس و پاکستان و مملکتِ سعودی عرب نا نیام اٹ کڑمب ایلمی و اسٹریٹجک تعلقداری تا پین سوگوی کن اونا نمان خذمت آتا ستاءِ کرے۔ وزیراعظم خادم الحرمین الشریفین شاہ سلمان بن عبدالعزیز آل سعود و ولی عہد و وزیرِاعظم عرب شہزادہ محمد بن سلمان بن عبدالعزیز آل سعود نا جان و جوڑی کن نیک استخواہی تا درشانیءِ کرے۔ وزیرِاعظم پاکستان کن سعودی عرب نا پدریسہ مخ تفی وکمک نا ستاءِ کرسا ڈیہہ اٹی امن و سوگوی نا مونی دننگ کن سعودی عرب نا اہم کڑد انا ستاءِ کرے۔ سعودی سفیر نواف بن سعید المالکی تینا سفارتی زمواری تا وخت آ پاکستان نا کنڈآن رسینگوک جم وجوش‘ کمک و مہمانداری آ وزیرِاعظم و حکومتِ پاکستان نا است انا ہب اٹ منت واریءِ ہرفے۔ او پاکستان اٹ تینا اڈکننگ ءِ اسہ یاتگار و گچین ءُ آزموندہ اس گوندسا پاکستان و سعودی عرب نا تعلقداری تے پین سوگو کننگ کن تینا جندی عزم انا درشانیءِ کرے۔ وزیرِاعظم سعودی سفیر کن اونا بروک آ زمواری تیٹی سرسہبی کن نیک استخواہی تا درشانیءِ کرے۔