حقدار طالب علم آتا پنی آ یونیورسٹی تسکان رسیفنگ کن کاریم کننگ اُن،ڈاکٹر خالد مقبول صدیقی

بنجائی وزیر تعلیم و کسبی ہیلکاری ڈاکٹر خالد مقبول صدیقی پارینے کہ پاکستان تینا لائخ و حقدار طالب علم آتے دنیا نا پنی آ یونیورسٹی تسکان رسینگ تننگ و ملکی ہیومن ریسورس ءِ قومی شونداری نا اولیتی بشخ آتتون ہم گرنچ کننگ کن سنبرینگوک ءِ۔ او دا ہیت ءِ واشنگٹن ڈی سی ٹی جارج ٹاؤن یونیورسٹی نا جہانی رابطہ غاتا نائب صدر تھامس بینکوف تون اوڑدہی نا وخت آ پارے ہراڑے بنجائی وزیر بڑزکو کہولی پاکستانی ڈل انا کماشی ءِ کرے۔ اوڑدہی پاکستان ایجوکیشن اینڈومنٹ فنڈ (پاک ای ای ایف) نا رداٹ بناکروک اسہ اہم پروگرام اسے نا ریسہ اٹ مس ہرانا مسخت زرگزرانی حالیت آتیان چَپ میرٹ نا بنداو آ پاکستانی طالب علم آتے امریکہ نا پنی و بڑزکو کہولی جہانی درجہ بندی نا یونیورسٹی تیٹی بڑزکو تعلیم نا وارخواہی تننگ ءِ۔ ڈل جارج ٹاؤن یونیورسٹی نا تاریخی رگس لائبریری نا ہم دورہ ءِ کرے۔ دا وخت آ ہڑتوم آ کنڈآن خیرخواہی و ادارہ ئی کمکاری نا عزم انا درشانی ءِ کننگا۔ بنجائی وزیر اوڑدہی نا وخت آ پاکستان نا ورنا آبادی ءِ ملک انا اہم انسانی میرات گوندسا پارے کہ پاکستان نا کم و ود 65 درسد آبادی 30 سال آن کم وئی بندغ آتیا تالان ءِ ہرافتے اے آئی‘ ذہانت، سائبر سیکورٹی، ڈیٹا سائنس، حیاتیاتی ٹیکنالوجی، چاگڑد و موسمی بدلی، کشت وکشارو السی پالیسی کون آ اہم بشخ آتیٹی بڑزکو تعلیم و پٹ وپول نا وارخواہی تننگ حکومت نا اولیت ءِ۔ او جارج ٹاؤن یونیورسٹی نا مون آ تین پہ تینی زرکاری آ تالان شریداری نا اسہ جامع خاکہ اس ہم پیش کرے۔ سلاہ نا رداٹ پاک ای ای ایف ہر طالب علم ءِ سال انا29 ہزار امریکی ڈالر اسکان وظیفہ فراوان کیک وخت اس کہ جہانی درجہ بندی نا پنی آ یونیورسٹی پاکستانی طالب علم آتے کن پورو یا نیمہ ٹیوشن فیس معافی نا دروشم اٹ کمک کیک۔ داکان بیدس پاکستانی طالب علم آتے جہانی آب انا تعلیمی پروگرام تتون اوار کننگ کن اسیجائی رابطہ پلیٹ فارم اس جوڑ کننگ نا سلاہ ہم تننگا۔ بنجائی حکومت بڑزکو تعلیم کن 1.5 ارب روپئی جتا کرینے ہرافتے قومی اہمیت والا بشخ آتیٹی پوسٹ گریجویٹ و ڈاکٹریٹ تعلیم کن کاریم اٹ اتنگک۔