انسانی سمگلنگ و حوالہ ہنڈی نا مافیا نا مچ آ چین ءِ گھیڑ کننگے، بنجائی وزیر داخلہ

بنجائی وزیر داخلہ محسن نقوی ایف آئی اے زونل آفس لاہور نا دورہ ءِ کرے و خصوصی دیوان نا کماشی ءِ کرے، دیوان اٹ ایف آئی اے زونل آفس نا اپ گریڈیشن پراجیکٹ، انسانی سمگلنگ، حوالہ ہنڈی و کسبی ڈوہدارگینگ آتا برخلاف کارروائی و ایلو باندات آتا جاچ ءِ ہلنگا۔ ایف آئی اے نا ترجمان نا رداٹ وزیر داخلہ محسن نقوی ایف آئی اے زونل آفس نا اپ گریڈیشن پراجیکٹ آ پیش رفت نا جاچ ءِ ہلسا ڈٹ ءِ زوت پورو کننگ نا پارت کرے۔ او انسانی سمگلنگ و حوالہ ہنڈی نا مافیا نا برخلاف گچین کارروائی نا پرمان جاری کرسا پارے کہ انسانی سمگلنگ و حوالہ ہنڈی نا مافیا نا مچ آ چین ءِ گھیڑ کننگے۔ محسن نقوی پارے کہ کسبی ڈوہدار گینگ آتا برخلاف کریک ڈاؤن ایف آئی اے نا زمواری ءِ، دا بابت عملی بھرم بایدے خننگے۔ ایف آئی اے نا افسر و کارندہ غاتے وس انا کچ آسانی و وسیلہ فراوان کننگ اُن و پین ہم کینہ۔ دیوان اٹ مچ آ ملک انا ایئرپورٹ آتیا امیگریشن کاؤنٹر تیا لگوک آ متکن آکیمرہ غاتے بدل کننگ نا فیصلہ کننگا، وخت اس کہ پوسکن انگا ٹیکنالوجی نا کیمرہ غاتا خلنگ نا اصولی منظوری ءِ ہم تننگا۔ غاو نوشتہ کننگ کن پاک آئی ڈی ایپ نا خذمت آتے ہلنگ نا ہم اصولی فیصلہ ءِ کننگا۔ ڈائریکٹر ایف آئی اے زونل آفس لاہور دیوان ءِ اپ گریڈیشن پراجیکٹ آ پیش رفت و کارکڑد نا بابت حوال تس۔ حوال اٹ پاننگا کہ تدوک آ اسہ سال اٹ 1670 ایف آئی آر نوشتہ کننگا، وخت اس کہ 5 ہزار انکوائری تیان 4 ہزار انکوائری تے سرتننگا۔ دا وخت اٹ 295 اشتہاری دوبہ دارآتے دزگیر کننگا۔ دیوان اٹ ڈی جی ایف آئی اے، ڈائریکٹر ایف آئی اے زونل آفس لاہور و کل سرکل انچارج آک بشخ ہلکر۔