خواری کش آتے خلنگ لغوری و است ہسون ءُ وڑ اسے، سردار کھیتران

بلوچستان اسمبلی نا باسک و مسکوہی صوبائی وزیر سردار عبدالرحمن کھیتران ضلع پشین نا علاقہ سرانان اٹ بے گناہ مزور تا خون نا سخت انگا لوز آتے ٹی مذمت ءِ کرسا پارینے کہ خواری کش آتے شست کننگ لغوری و است ہسون عمل اسے۔ بے گناہ مزور تا خون ہچ ءُ وڑاسے ٹی زیان مفک اوواقعہ ٹی اوار زموار آتے امر کہ مرے کانود نا مون آ اتنگے۔ سردار عبدالرحمن کھیتران پارے کہ مزور تپہ تینا خواری و خید اٹ راج انا بنداو ءِ سوگو کیک۔ او تینا چناتا گچین آخبت و خاہوت نا ولفنگ کن سخت حالیت آتیٹی ہم خواری کیرہ۔ دا وڑ انا بندغ آتے شست کننگ نئے بیرہ اسہ خاہوت اسے برباد کننگ آنبار ءِ بلکن راج انا پرامن و خواری کش تپہ ٹی خلیس و بھیم تالان کننگ نا کوشست اس ہم ارے۔او پارے کہ بلوچستان نا الس دہشت گردی و بیدادی نا چٹفنگ خواہک و امن دشمن زموارآتے دا پیدوار کلہو سر مرے کہ ریاست و الس اوفتا ارادہ غاتا مون آ اسٹ ءُ۔ تعلقدار ادارہ غاک واقعہ نا کنڈہلپروک و گچین جاست وپاست ءِ کرسا خونی تسکان سرمریر اوفتے کانود نا رداٹ سخت سزا ترفنگے۔ سردار عبدالرحمن کھیتران زوال مروک مزورتا پدخاہوت آتتون است ہسونی نا درشانی ءِ کرسا پارے کہ دا ڈکھیائی ناساہت اٹی او زہمی خاہوت آتا ڈکھیائی ٹی بریبر نا شریدار ءِ۔ او شہید آتا بخشش و خاہوت آتے کن صبر انا دعا کرے۔