بلوچستان حکومت سرکاری ملازمت آتیٹی شفافیت ءِ پک کرینے،شاہد رند

کمکار وزیراعلیٰ بلوچستان حوالکاری و سیاسی باندات شاہد رند پارینے کہ حکومتِ بلوچستان سرکاری نوکری تا بھرتی ٹی شفافیت، میرٹ و بریبر وارخواہی ءِ پک کننگ کن عملی گام گیج کرینے‘ بلوچستان ریونیو اتھارٹی (BRA) ٹی 19 افسر نا بھرتی پورو وڑ اٹ نِلا میرٹ نا بنداو آ کننگانے و دا مچ آ عمل اٹی ہچ ءُ وڑ اسے نا سفارش یا سیاسی زور شاغنگ ءِ امنا کننگ تنے۔ تینا اسہ بیان اسے ٹی شاہد رند پارے کہ وزیراعلیٰ بلوچستان میر سرفراز بگٹی اولیکودے آن پیدوار کرینے کہ سرکاری نوکریک بہا مفسہ و ورنا چین ءِ اوفتا حق بیرہ میرٹ نا بنداو آ رسینگک۔ ہندا پالیسی نا رِداٹ محکمہ تعلیم اٹی 4500 و محکمہ خزانہ ٹی 111 اسامی تیا ہم پورو شفاف و میرٹ آ بھرتی کننگانے۔ او پارے کہ بلوچستان ریونیو اتھارٹی ٹی 19 افسر نا داسہ نا تقرریک ہم ہندا میرٹ آ تالان پالیسی نا ریسہ اسے ءُ۔ دا بھرتی تا عمل اٹی وزیراعلیٰ بلوچستان نا جند انا خلق/ضلع غان اسہ اومیتدار اسے نا ہم سرسہب مفننگ دا ہیت ءِ پاش کیک کہ بھرتی نا مچ آ عمل اٹی ہچ ءُ سیاسی یا انتظامی نیام تمنگ اس متنے۔ شاہد رند پارے کہ حکومت بلوچستان نا مسخت ورناتے بیرہ سرکاری نوکری تننگ آخا بلکن اسہ ہندن ءُ شفاف ءُ نظام اس جوڑ کننگ ءِ ہراٹی ہر ورنا ءِ تینا لائخی و اہلیت نا بنداو آ مونی ہننگ نا بریبر وارخواہی دوئی مرے۔ میرٹ آ مروک بھرتیک ادارہ غاتا کاریمی واکداری کچ اٹ ودکی تون اوار ورنا تا ریاستی ادارہ غاتیا پت ءِ ہم دوارہ بحال کیک۔