کیٹی بندر پورٹ نا شونداری کن سُج پام اٹ کاریم کننگے،صدر آصف علی زرداری

اسلام آباد، صدر مملکت آصف علی زرداری کیٹی بندر پورٹ نا شونداری کن سوگو سُج پام اس دوئی کننگ آ زور ِشاغسا پارینے کہ ڈٹ ءِ پت کڑزوک سڑک، بجلی و دیر انا فراوانی، صنعتی بنداوی پنجر و ایلو المی آسراتی تتون بایدے گنڈنگے، دوشنبے نا دے آایوانِ صدر نا پریس ونگ آن جاری بیان نا رداٹ صدر مملکت دا خیال آتا درشانی ءِ چائنا ہاربر انجینئرنگ کمپنی (سی ایچ ای سی) نا کنڈ آن کیٹی بندر پورٹ نا سلاہ ئی شونداری نا بابت تروک آ حوال نا وخت آ کرے، او چینی ڈل ءِ بخیر کرسا پاکستان نا بنداوی پنجر و بحری شونداری ٹی کمکاری کن چین نا پدریسہ است خواہی نا ستاءِ کرے۔صدر مملکت پارے کہ کیٹی بندر اٹی اسہ ودکی بحری گیٹ وے اسے نا وڑ اٹ نمان لائخی ساڑی ءِ ہرا پاکستان نا پورٹ و لاجسٹکس نیٹ ورک ءِ سوگو کننگ، رابطہ کاری و واپار ءِ مون آ دننگ اٹی کمکار مننگ کیک، او چینی فریق وتعلقدار پاکستانی ادارہ غاتا نیام اٹ خڑکی تکنیکی رابطہ کاری نا گرج آ زور شاغا۔ او دا ہیت آ ہم زور شاغاکہ چاگڑدی مدامگی ءِ بنداوی اہمیت بایدے دوئی مرے، خاص وڑ اٹ سندھ دریاب نا ڈیلٹا نا نازرک چاگڑدی نظام نا رکھ و ہندی ماہی گیربرادری تا فائدہ و روزگار ءِ مون آ تخنگے۔ صدر مملکت ماسٹر پلان ءِ پین گچین کننگ و اودے عملدرآمد و مالی کمک نا جوان وڑ و پیم انا پیدواری کن پدریسہ تکنیکی سلابت نا است بڈی ءِ کرے۔ چینی ڈل کیٹی بندر پورٹ نا تصوراتی ماسٹر پلان آ حوال تس ہراٹی چندی ٹرمینل، لاجسٹکس و کمکار بنداوی پنجر تون اسہ پوسکن ڈیپ واٹر میری ٹائم گیٹ وے اسے نا تصور ءِ پیش کننگانے، اولیکو ریسہ ٹی 500 میٹر مریس دُون آ تالان کثیر المقاصد ٹرمینل اوار ءِ، وخت اس کہ بنائی انجینئرنگ خڑچ انا کساس کم و ود 522.34 ملین امریکی ڈالر خلنگانے۔ چینی ڈل اٹ پاکستان اٹ سی ایچ ای سی نا چیف نمائندہ وو پنگ، مارکیٹنگ ڈیپارٹمنٹ نا سروک وانگ زونگ ڈے و انجینئر شو تیے لِن آن بیدس اسٹریٹجی اینڈ مارکیٹنگ نا جنرل منیجر علی رضا اسک اوار ئسر۔ دیوان اٹ وزیراعلیٰ سندھ سید مراد علی شاہ، سینیٹر سلیم مانڈوی والا و شیری رحمان، سندھ انا وزیر توانائی، ڈٹ بندی و شونداری ناصر حسین شاہ، وزیراعلیٰ سندھ انا زرکاری و پبلک پرائیویٹ پارٹنرشپ کن خصوصی کمکار سید قاسم نوید قمر و چیف سیکرٹری سندھ سید آصف حیدر شاہ اسک ہم بشخ ہلکر۔