ٹریفک کانود آتا خلاف ورزی کروک آتا برخلاف کارروائی کننگک، سید عاصم شاہ

کوئٹہ، سپرنٹنڈنٹ آف پولیس ٹریفک صدر سرکل کوئٹہ سید عاصم شاہ پارینے کہ شار اٹ ٹریفک نا نظام ءِ پین منظم و گچین جوڑ کننگ کن گچین گام گیج کننگ انگ ءِ، ٹریفک نا روانی ءِ برجا تخنگ، شاری تے مون تروک مشکل آتے چٹفنگ و ٹریفک کانود آتا عملدرآمد ءِ المی جوڑ کننگ کن ٹریفک پولیس تینا زمواری تے پبی وڑ اٹ پورو کننگ ءِ۔ دا خیال آتا درشانی ءِ او دوشنبے نا دے ”اے پی پی“تون ہیت وگپ کرسا کرے۔ سید عاصم شاہ پارے کہ کوئٹہ شار اٹ ٹریفک نا کچ دے پہ دے ودنگ ءِ ہرانا سوب آن ٹریفک نا روانی ءِ برجا تخنگ اسہ بھلو چیلنج اسے، ٹریفک پولیس شار انا چندی علاقہ، اہم شاہراہ و اختہ ئی ہند آتیا ٹریفک نا حالیت آتا پدریسہ جاچ ءِ ہلنگ ءِ و ہراڑے گرج مرے ہموڑے ٹریفک نا روانی ءِ گچین جوڑ کننگ کن گام گیج کننگ انگ ءِ۔ او پارے کہ بھلا گاڈی و ہیوی ٹریفک نا بابت ہم اسہ گچین حکمت عملی اس جوڑ کننگ انگ ءِ تانکہ دے انا وخت اٹ شار انا رش والا کسر تیا ٹریفک نا کچ ءِ کم کننگ مرے۔ کوشست کننگ انگ ءِ کہ بھلا گاڈی تے خاص وخت خاص وڑ اٹ ننکان شار اٹ پترینگ انگ نا موکل تننگانے ہراڑان شاری علاقہ غاتیٹی ٹریفک نا روانی ءِ گچین جوڑ کننگ اٹ کمک رسینگک، دا رد اٹ تعلقدار کمامدار و ایلو اسٹیک ہولڈر آتتون سلابت آن پد عملی گام گیج کننگک۔ ایس پی ٹریفک پارے کہ ٹریفک نا نظام نا گچینی بیرہ ٹریفک پولیس نا زمواری اف بلکن اوڑکن شاری تا کمک ہم بھاز المی ءِ، شاریک ٹریفک کانود آتا پابندی ءِ کیر، غلط پارکنگ کپس‘ پک لین اٹ گاڈی چلیفر و ٹریفک کارندہ غاتا کنڈ آن تننگوک پارت آتیا عمل کیر تانکہ کسر تیا ٹریفک نا روانی ءِ گچین جوڑ کننگ مرے۔ او پارے کہ ٹریفک پولیس الس ءِ آسانی تا فراوانی و ٹریفک نا مشکل آتا ایسری کن ہر وڑ انا گام گیج کننگ ءِ، شاری تا کنڈ آن کانود نا عملدرآمد و ٹریفک پولیس تون کمک آن نئے بیرہ ٹریفک جام نا مشکل آتے ٹی کمتی بریک بلکن شکست آتا توننگ و کسر تیا رکھوک سفر ءِ ہم المی جوڑ کننگ اٹ کمک رسینگک۔ سید عاصم شاہ پارے کہ ٹریفک کانود آتا خلاف ورزی کروک آتا برخلاف کانود نا رداٹ کارروائی کننگک، ولے ٹریفک پولیس نا بنداوی مسخت شاری تے آسراتی فراوان کننگ و ٹریفک نا نظام ءِ منظم جوڑ کننگ ءِ۔ او شاری تیان خواست کرے کہ او زمواری نشان ترسا ٹریفک پولیس تون کمک کیر تانکہ کوئٹہ نا ٹریفک نا نظام ءِ پین گچین، منظم و الس دوست جوڑ کننگ مرے۔